Ramelau F.C Prontu Kompete iha Liga Futsal ho Forsa Foun

Jogadór sira Ramelau F.C halo preparasaun atu enfrenta iha Liga Futsal Timor-Leste époka 2026/2027 ne'ebé sei hala'o iha 11 Setembru 2026.

Díli, 31 Agostu 2026 (RAFA) –Klubu Ramelu  F.C prontu kompete  ho forsa jogador foun iha Liga Futsal Primeira Divizaun époka 2026/2027 ne’ebe sei realiza iha loron 11 fulan-Setembru-ne’e.

Asistente Treinadór Ramelau F.C, Filipe Gomez, ba  a RAFA, iha Kampu Futsal Kampo Baru, Díli, Domingu-liubá hatete, maski Ramelau F.C maioria ho jogadór foun, maibé ekipa kontinua prontu atu enfrenta kompetisaun ho klubu sira seluk.

“Ami ba ho jogadór foun, maibé ami la’ós ba atu partisipa de’it. Ami ba atu kompete no hada’u malu ho klubu sira seluk, tanba ami fiar ami nia preparasaun,” Filipe Gomez hateten.

Nia subliña, tinan ne’e Ramelau F.C fó prioridade ba preparasaun jogadór ho idade ki’ik, liuhosi treinamentu regular, semana ida dala-tolu, hodi hasa’e abilidade, kapasidade no konfiansa jogadór sira atu enfrenta kompetisaun.

Ramelau F.C mós fó prioridade ba envolvimentu jogadór lokal, hodi prepara talentu Timoroan ne’ebé iha poténsia atu haforsa ekipa selesaun nasioná futsal iha futuru.

Fatin hanesan jogadór foun, Ramelau F.C, Patricio Pereira da Silva relata katak nia desizaun atu joga iha klubu ne’e, tanba hakarak hetan esperiénsia foun no hasa’e tan nia kapasidade hanesan jogador.

“Hau muda mai klubu Ramelau atu aumenta ha’u nia esperiénsia no hasa’e ha’u nia abilidade hanesan jogadór. Ha’u mós hakarak ajuda Ramelau sai kampiaun,” Patricio hateten.

Klubu sira ne’ebé rejistu ona iha Órgaun  Liga Futsal hodi partisipa iha liga futsal mak hanesan, Ramelau FC, Mushila FC, Mauputar FC, Caeser Dante FC, Coelho FC, SFX FC, Maudoko FC, Crazy Hours FC, Saralima FC, AD Estrela Baguia, AD BAS, Kuda Ulun FC, AS Jerman no B’Tal FC.

Jornalista: Marito da Costa