Desporto

Ramelau F.C Fahe Pontu Hanesan ho Mauputar F.C 2-2

todayNovember 9, 2026 14

Background
share close

Díli, 09 Novemberu 2026 (RAFA)- Ekipa Ramelau F.C fahe pontu hanesan ho Mauputar F.C hafoin empata ho score 2-2 iha jogu kontinuasaun Liga Futsal Timor-Leste primeira divizaun jornada da ualu ne´ebé halao iha Kampu Futsal F-FDTL iha Díli, Domingu-ne´e.

Iha  inisiu jogu, ekipa rua hatudu ambisaun atu produs golu. Ramelau F.C ne´ebé iha zona degradasaun iha ambisaun atu hadi’a pozisaun iha tabela klasifikasaun, nune’e mós ekipa Mauputar F.C ne´ebé mak iha tabela klasifikasaun dahuluk esforsu atu mantein ukun tabela klasifikasaun ho nune’e halo jogu ekipa rua ne’e sai atrativu liután.

Tama ba iha minutu ualu, Ramelau F.C susesu produs  uluk golu harosu rede Mauputar F.C liu husi jogador Patricio da Silva hodi lori nia ekipa Ramelau F.C lidera ho score 1-0.

Ho score refere tensi jogu kontinua manas ba ekipa rua ne’e hodi lansa kontra atake ba malu maibé laiha tán golu ruma mak akontese too primeira parte termina Ramelau F.C mantein lidera 1-0.

Kontinua ba segunda parte tensi jogu kontinua aas ba ekipa rua  hodi lansa kontra atake ba malu.

Tama ba iha minutu 34, Mauputar F.C tenke joga ho jogador na’in-haat hafoin Jenilton Pinto hetan kartaun kinor ba daruak.

Menus jogador ida, Ramelau F.C konsege aproveita hodi produs golu asoru rede Mauputar F.C hodi muda score sai 2-0 liu husi jogador Joao Guterres.

Iha minutu 37, Mauputar F.C konsege hamihis diferensa sai 2-1 liu husi jogador Antonio da Silva.

Liu deit minutu ida Ortega Patola susesu fura tan rede Ramelau F.C hodi halo balansu ba score sai 2-2 no rezuldu ne’e mantein to’o termina jogu segunda parte.

Jornalista: Davilio Valdamir/Mario Fili

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!