Qatar Halo Surpeza Ba Suisa, Empata 1-1 iha Jogu Grupu B Kopa Mundiál 2026

Qatar halo supreza ba nia adversáriu Suisa iha jogu kontinuasaun faze apuramntu grupu B Kopa Mundiál 2026 ho score 1-1. Imajen/Getty

Díli, 14 Juñu 2026 (RAFA.TL)- Ekipa Selesaun Nasionál Qatar halo surpeza ba nia adversáriu Suisa iha jogu kontinuasaun faze apuramntu grupu B Kopa Mundiál 2026 hafoin ekipa rua empata 1-1.

Jogu entre Qatar hasoru Suisa ne’ebé hala’o iha Levi’s Stadium, Santa Clara, Domingu (14/06/2026), ekipa rua joga ho ambisaun hanesan. Maibé Qatar konsege halo surpreza hafoin derota iha segunda parte halo empata ba jogu ne’e hodi ekipa rua fahe pontu hanesan.

Iha jogu primeira parte hahú, ekipa Qatar konsege atu marka golu iha minutu daruak hafoin Edmilson Junior aproveita bola husi erru  ne’ebé komete husi jogadór Suisa, Manuel Akanji no lansa kedas suta ida, maibé nia esforsu hetan salvasaun husi Gregor Kobel.

Suisa ameasa iha minutu lima, Dan Ndove simu bola liu no hatama kedas suta ida, maibé bola ne’e salva hosi guarda rede Mahmud Abunada. Ndove besik atu marka fali golu iha minutu sanulu, liu husi sutu ne’ebé iha maibé bola sei dok husi alvu.

Suisa hetan penalidade hafoin Abunada halo falta ba Remo Freuler, iha minutu 17 no Breel Embold ne’ebé hetan oportunidade atu ezekuta konsege marka golu hodi lori nia ekipa lidera jogu ne’e ho score 1-0.

Jogador Suisa Edmilson iha oportunidade atu marka tan golu ba Qatar iha minutu 42, maibé nia esforsu hetan salva hosi Gregor Kobel. No Suisa la konsege aumenta tan golu no score mantein 1-0 to’o intervalu.

Tama ba segunda parte,  ekipa Qatar kontinua halo esforsu no mudansa ba tátika iha jogu hodi hahú pasa bola no halo kontrolu ida másimu atu halo empata ba jogu ne’e no buka oportundade atu produs golu.

Ekipa Suisa mantein kontrolu jogu iha minutu 20 dahuluk hosi segunda parte, Granit Xhaka ho nia kolega sira tenta atu lansa atake sira hosi ángulu oioin ba Qatar. Maske nune’e, Qatar halo jogu ho defeza  di’ak tebes, halo  Suisa susar atu tama to’o iha área penalidade.

Tama ba tempu estra segunda parte, Qatar liu husi nia jogadór Boualem Khoukhi marka golu ida liu husi bola kabesada hafoin aproveita bola kruza ne’ebé iha no ho golu ne’e halo Qatar rekolla pontu hanesan ho Suisa iha grupu.

NTV/ETO Telco iha direitu ofisiál ba transmisaun  Kopa Mundiál 2026 iha Timor-Leste.

Jornalista : Davilio Valdamir/Editór: Vito Salvadór