PM Xanana Konsidera DITE Nu’udár Oportunidade Atu Aprende no Promove Produtu Timor-Leste

PM Xanana partisipa iha Dili Internasionál Trade Expo (DITE) iha CCD, Kinta (28/08/2025). Imajen/Rafa.tl

DILI, RAFA.tl– Primeiru-Ministru (PM), Kay Rala Xanana Gusmão, konsidera Dili Internasionál Trade Expo (DITE) nu’udár oportunidade atu mikro no pekena empreza sira iha Timor-Leste bele aprende no promove produtu Timor-Leste bá merkadu internasionál.

Notísia Relevante: Dili Internasionál Trade Expo Hametin Konetividade Setór Privadu Nasionál Atu Kompete iha Merkadu Global

Primeiru-Ministru, Kay Rala Xanana Gusmão iha nia diskursu  abertura DITE, ne’ebé hala’o iha Sentru Konvensaun Dili (CCD, sigla portugés), Kinta (28/08/2025), hateten eventu ida-ne’e hanesan oportunidade bá Timor-Leste, oinsá atu fahe esperénsia no aprende hamutuk entre nasaun sira ne’ebé partisipa iha expozisaun ne’e hodi bele kolabora hamutuk iha setór oi-oin, atu promove liután produtu oragániku sira iha Timor-Leste.

“Expo ne’e hanesan oportunidade ida bá jogadór demolisaun sira. Negósiu ki’ik no médiu, atu fahe no aprende bá malu. Ida-ne’e maka oportunidade ida atu hatudu inovasaun, kultura no teknolojia. No ida-ne’e maka oportunidade ida atu haburas kolaborasaun iha setór oioin,” Xanana Gusmão hateten.

Xefe Governu hatutan,  governu nia papel maka atu apoiu negosiu kiik sira, loja komersiál sira, agrikultór sira, fabrikante no inovadór sira, hodi nune’e, bele halo fasil liubá negósiu no hadia di’ak liután infrastrutura iha rai-laran.

Expozisaun internasionál ida-ne’e, Xanana Gusmão tenik, hanesan maneira ida atu hatete bá mundu katak Timor-Leste mós iha produtu potensiál barak, atu kompete iha merkadu internasionál.

Timor-Leste iha mehi atu servisu maka’as, tanba Timor-Leste enfrenta dezafiu foun sira, tanba dois tersu husi populasaun besik rihun 35, joven sira prontu atu kontribui bá dezenvolvimentu iha Timor-Leste.

“Atu harii nasaun demokrátiku no ekonómia nakloke, ho respeitu bá direitu umanu no estadu de direitu ohin loron. Ita hasoru dezafiu foun sira, dois tersu hosi ita-nia populasaun, ita-nia joven sira prontu atu serbisu, prontu atu halo inovasaun no prontu atu kontribui. Ita presiza kria empregu atu hamenus kiak no atu fó oportunidade bá ita-nia joven sira atu harii sira-nia moris iha ita-nia rain,” Xanana afirma.

Maske hasoru dezafiu soberania ekonomika, maibé governu nafatin iha planu estratejiku, governu iha vizaun bá tempu naruk atu dezenvolve povu Timor-Leste, atu harii infrastrutura kritiku no kria ekonómia ida ne’ebé diversifikadu no rejielente liubá povu Timor-Leste.

Xanana dezafia emprezáriu no emprezaria Timor-Leste sira, atu prepara aan di’ak liután,  hodi hanoin bá oportunidade ne’ebé Timor-Leste iha, tanba iha fulan-Outobru 2025 sei adere ofisialmente bá ASEAN no hamutuk ho populasaun tomak iha rejiaun Aziátiku, ne’ebé loke oportunidade bá ema liu millaun 600 ne’ebé sei kompete.

Reportajen ekipa Rafa.tl