Insidente iha Fronteira RDTL-RI, PNTL-POLRI ho TNI iha Komunikasaun Di’ak Loos Hodi Garante Pás Bá Komunidade

Portavós PNTL, Superintendente João Belo dos Reis (klaran) lidera konférensia imprensa hodi atualiza situasaun iha teritóriu nasionál, Kinta (04/09/2025). Imajen/Rafa.tl

DILI, RAFA.tl-Polísia Nasionál Timor-Leste (PNTL) liuhosi Unidade Patrullamentu Fronteira (UPF) ho Polísia Repúblika Indonézia (POLRI) no Tentara Nasionál Indonézia (TNI) estabelese koordenasun no komunikasaun di’ak loos hodi kontínua garante povu sira iha fronteira Timor-Leste no Indonézia moris hakmatek, pás no trankulidade.

Notísia Relevante: Kona-bá Insidente iha Fronteira, PNTL-POLRI Halo Investigasaun Konjunta

Hafoin insidente tiru ne’ebé akontese iha fronteira terrestre RDTL-RI iha Oé-Cusse, Segunda-feira 25 fulan-Agostu 2025, ne’ebé rezulta sidadaun Indonéziu no membru UPF balun kanek, parte sira liuliu autoridade Timor-Leste ho Indonézia  (UPF, POLRI ho TNI) halo kedas komunikasaun intensivu hodi evita konflitu ne’e espalla halo kle’an no boot.

Portavós Polísia Nasionál Timor-Leste (PNTL) Superintendente João Belo dos Reis, Kinta (04/09/2025), relata  katak iha insidente ne’e,  membru  UPF na’in-tolu kanek no PNTL liuhosi Servisu Investigasaun Kriminál aprezenta ona autos bá Ministériu Públiku (MP).

“Atu hato’o de’it katak situasaun parte ne’ebé mak mosu konflitu agora dadaun kontroladu, koordensaun ho autoridade Indonézia  la’o di’ak tebe-tebes,” Superintendente João Belo dos Reis informa liuhosi konferénsia imprensa iha Ministériu Interiór, Vila-Verde, Dili.

Nia hateten prosesu investigasaun la’o hela no negosiasaun ho parte Indonézia  kontínua la’o, iha indikasaun tanba fronteira ne’ebé mak iha mudansa  maibé parte husi ekipa RDTL-RI kontínua servisu para hala’o tuir akordu ne’ebé mak iha.

Husi parte autoridade INdonézia nian, Tentara Nasionál Indonézia (TNI) ho POLRI halo ona alerta no avízu bá sira-nia sidadaun atu labele tama área ne’ebé mak la pertense ona ba Indonézia.

Molok ne’e, iha loron 03 fulan-Setembru 2025, Ministru Interiór, Francisco da Costa Guterres, hatún kedas orientasaun bá Komandu PNTL mobiliza diálogu ho autoridade sivíl no militár iha área froteira hodi minimiza konflitu entre komunidade parte rua iha liña fronteira terrestre Suku Bobometo, Postu Administrativu Oesilo, Rejiaun Administrativa Espesiál Oé-Cusse  Ambeno (RAEOA) ho Distritu Timor Tengah Utara (TTU), Suku Inbate, Postu Bikomi Nilulat, Nusa Tenggara Timur (NTT)-Indonézia.

“Ita halo dialógu no ita mós mobiliza komunidade sira no autoridade lokál  sira para depois ita tenta nafatin kontínua halo dialágu tanba meiu ida diálogu ne’e mak hodi ajuda rezolve problema,” Ministériu Interiór, Francisco da Costa Guterres  hateten bá jornalista sira iha resintu Palásiu Governu.

Ministériu Interiór  Francisco da Costa Guterres hateten atu hatene problema nia hun mak iha ne’ebé, depois buka solusaun hodi rezolve tiha ida-ne’e, nune’e orientasaun husi Ministru Interiór la’o tiha ona no Komandu PNTL desloka bá  Oé-Cusse  hahú prosesu diálogu, inklui mós mobiliza Polísia Komunitáriu sira iha Munisípiu Covalima atu hahú regularmente halo enkontru ho komunidade sira ne’ebé hela besik iha liña fronteira RDTL-RI.

Reportajen Ekipa Rafa.tl