Deskonfia Komete Krime Deskamiñu ho Fraude Fiskál, Tribunál Aplika Pena Multa US$64,500.00 Bá Sidadaun Estranjeiru Na’in-tolu

Polísia aprezenta arguidu sidadaun estranjeiru na'in-tolu ba Tribunál tanba deskonfia komte krime deskamiñu no fraude fiskál. Imajen/Rafa.tl

DILI, RAFA.tl– Tribunál Judisiál Primeira Instánsia Dili (TJPID), Sesta (29/08/2025), aplika pena multa no aprezentasaun periodika bá arguidu na’in-tolu nu’udár sidadaun estranjeiru  ne’ebé deskonfia komete krime deskamiñu no fraude fiskál iha Timor-Leste.

Notísia Relevante: Sidadaun Estranjeiru Na’in-tolu Deskonfia Komete Krime Deskamiñu no Fraude Fiskál

Iha kontinuasaun audénsia julgamentu ne’ebé prezide husi Juíza Ercilia de Jesus, no Ministériu Públiku reprezenta husi Prokuradór Matias Soares iha Tribunál Judisiál Primeira Instánsia Dili, aplika medida koasaun rua bá arguidu na’in-tolu, mak hanesan pena multa ne’ebé kada sidadaun sei multa ho valor osan US$21,500.00 (bá ema na’in-tolu hamutuk US$64,500.00) no aprezentasaun periodika kada fulan hodi hein Ministériu Públiku nia  investigasaun kle’an bá prosesu ida-ne’e.

Advogadu privadu, Januario Martins ne’ebé fasilita asisténsia justisa bá arguidu na’in-tolu nu’udár sidadaun estranjeiru, kompostu husi na’in-rua ho nasionalidade Xina no na’in-ida seluk ho nasionalidade Indonézia, hetan pena multa tanba Tribunál konsidera adekuadu atu aplika bá arguidu na’in-tolu hodi fó fatin bá Ministériu Públiku halo investigasaun kle’an.

“Medida koasaun rua ne’ebé Tribunál aplika, konsidera adekuadu tanba, antes ne’e, aplika ona termu identidade rezidénsia (TIR). Medida kuasaun  aprezentasaun periódika kada fulan iha postu Polisía ne’ebé besik ho argidu sira nia hela fatin no medida koasaun multa bá kada arguidu ho valor orsamentu US$21,500.00 ne’ebé depozita direita bá iha konta Estadu nian hodi bele asegura prosesu investigasaun ne’ebe maka  lao hela,” Januario Martins informa.

Januario Martins, hateten parte defeza iha hanoin hodi haree meus legál seluk atu halo rekursu hodi kestiona kona-bá desizaun ne’ebé Tribunál aplika bá nia kliente nain-tolu ne’e, maibé sei konsulta ho arguidu sira karik sira konkorda.

Antes ne’e, Polísia Nasionál Timor-Leste (PNTL) liuhosi Diresaun Servisu Investigasaun Kriminál (DSIK) kumpre mandatu Tribunál Judisiál Primeira Instánsia Dili (TJPID) ho NUC 0037/24PGGCC hodi halo buska domisiliáriu apreensaun no mandadu detensaun bá sidadaun Xinés na’in-rua  ho  Indonéziu na’in-ida ne’e.

Buska domisiliáriu no apreensaun ne’e, PNTL hala’o iha Segunda dadeer (25/08/2025), hale’u tuku 09:00 Otl iha loja ida iha área Audian, Dili.

Iha buska ne’e, autoridade Polisiál mós halo identifikasaun bá estranjeiru na’in-tolu ne’e no foti mós evidénsia balun ligadu ho krime fraude fiskál ne’ebé previstu iha artigu 314 ho artigu 317 iha Kódigu Penál Timor-Leste.

Reportajen Ekipa Rafa.tl