Prosesa Dirijente SNI Hatama Sasán Kontra Bandu Tuir Lei

Prova fugetes ne'ebé ekipa konjunta PNTL ho F-FDTL prende husi dirijente SNI na'in-rua. Imajen/Espesiál

DILI, RAFA.tl-Membru Konisaun B Parlamentu Nasionál ne’ebé trata asuntu Negósiu Estránjeiru, Defeza no Seguransa, David Dias Ximenes Mandati, lamenta ho aktu dirijente Servisu Nasionál Intelijénsia (SNI) nian na’in-rua ne’ebé hatama fugetes ilegál ho karreta estadu no husu tenke prosesa tuir lei ne’ebé vigora.

Notísia Relevante: PNTL ho F-FDTL Prende Fugetes Husi Dirijente SNI Na’in-rua

Deputadu David Dias Mandati husi Bankada FRETILIN ne’e ba Jornalista sira iha Parlamentu Nasionál, Segunda (10/11/2025)  hateten, ba dirijente sira ne’ebé komete aktu sira hanesan ne’e tenke husu ba superiór sira atu atúa sira tuir prosesu dixiplinár, no kontinua prosesa tuir lei.

Nia afirma, ho akontesimentu ne’ebé iha, se bele karik, se de’it mak xefe tenke atúa sira tuir prosesu dixiplinár, karik prosesu dixiplinár ne’e, ba maka agravadu entaun ne’e prosesu kriminál fali ona, depende lei ko’alia hanusa.

Deputadu David Mandati husu ba públiku atu hein prosesu investigasaun, no husik lei halo nia servisu hodi kondena aktu ne’ebé maka dirijente sira ne’e komete.

“Lolós ne’e, la’os servisu informasaun intelijénsia maka halo fali buat sira ne’e, ida ne’e ita lamenta, maibé ita mós tenke fó marjen ida katak, ita ema ne’e la iha ema ida ne’ebé la sala, agora husik prosesu lei ne’e maka halo, iha prosesu dixiplinár,  agravadu ka simples ka oinsá, husik lei maka halo investigasaun,” Deputadu David Dias Ximenes Mandati hateten.

Reprezenta povu iha uma fukun PN ne’e hatutan, iha lei ne’ebé bandu atu hatama sasán ilegál, husu dirijente sira atu koopera, la presiza ema seluk maka tenke fó atensaun, maibé tenke respeita lei ne’ebé maka vigora.

Nia hateten Lei dehan labele, la presiza ema seluk kondena ita, maibe ita rasik kondena ita nia aan.

Deputadu ne’e mós kontinua fó hanoin ba dirijente sira katak, nu’udar Timoroan tenke respeita malu, respeita norma sira, tanba ida ne’e ita nia dever, direitu no obrigasaun.

“Direitu ne’e saida maka ita nian no obrigasaun ne’e saida maka ita bele halo ba ema seluk, tanba ne’e tenke kumpre para buat sira ilegál sira ne’e tenke halakon ka rekuza katak, ida ne’e la tuir ona lei ne’ebé atu fo mai ita sosiedade Timor atu respeita malu.” Tenik mandati.

Iha Sábadu kalan (08/11/2025), Ekipa Konjunta husi PNTL no F-FDTL halo operasaun pasa revista iha Postu-Administrativu Liquiça Vila, Munisípiu Liquiça, prende fugetes hamutuk packs 36 ne’ebé hatama husi dirijente na’in-rua husi Servisu Nasionál Intelijénsia no tula ho Kareta Governu ho númeru Matríkula 05-424 G.

Dadaun ne’e Servisu Investigasaun Kriminál Munisípiu Liquiça halo prosesu ba sasán kontra bandu hirak ne’e rejista ona ho NUK, 0068/25.LIMBR, kontinua aprezenta ba Ministériu Públiku (MP) hodi kontinua prosesu ba oin tuir lei.

Reportajen ekipa Rafa.tl