Primeira Divizaun Liga Timorense, DIT F.C Rekolla Pontu Tolu Hafoin Halakon Aitana F.C ho Score 2-1

Imajen/LFTL

Díli 14 Juñu 2026 (RAFA.TL)- Ekipa DIT F.C susesu rekolla pontu tolu hafoin iha jogu daruak Primeira Divizaun konsege halakon Adversáriu Aitana F.C ho score 2-1 liu husi golu jogadór Santos no Tanimola Ayobami.

Jogu kontinuasaun Liga Timorense époka 2026, entre DIT F.C no Aitana F.C ne’ebé hala’o iha Estádiu Munisipál Díli, Domingu (14/06/2026), ekipa rua tun ho forsa ne’ebé hanesan no hetan oportunidade hodi halo ameasa ba malu, maibé ekipa rua seidauk iha ida mak marka uluk golu.

DIT F.C lansa uluk kontra atake ho ritmu lais, maibé Aitana F.C la fó oportunidade ba DIT F.C no halo balansu ba jogu hodi mantein pozisaun ho score hanesan to’o primeira parte termina.

Tama ba segunda parte, ekipa rua ho ambisaun forte liután atu lansa kontra atake ba malu, maibé Aitana F.C iha liu oportunidade hodi marka golu ba DIT F.C iha minutu 63 liu husi jogadór Richard Nana Yaw.

Ho golu ne’e halo DIT F.C tenta halo balansu ba jogu no hadi’a jogu iha liña klaran hodi lansa mós atake ba Aitana F.C, nune’e konsege halo empata ba jogu ne’e liu husi jogadór José Santos iha minutu 70 no muda score ba 1-1.

Hafoin golu ne’e, DIT F.C iha liután animu hodi halo jogu ofensivu no lansa kontra atake ba Aitana F.C.

Ho ritmu jogu ne’ebé lais, DIT F.C konsege marka tan golu daruak iha minutu 88 liu husi jogadór Tanimola Ayobami.

Iha minutu ikus, Aitana F.C kontinua halo esforsu no hasa’e sira-nia intensidade jogu atu hodi marka golu, maibé DIT F.C mantein solidu hodi asegura vitória ne’ebé iha to’o jogu termina.

Ho vitória ne’e, ekipa DIT F.C rekolla pontu tolu husi jogu rua, enkuantu Aitana F.C rekolla de’it pontu ida husi ajogu rua.

Jornalista: Marito da Costa/Editór: Vito Salvadór