Primeira Divizaun, Emmanuel F.C Manán DIT F.C 2-1

Jogu Emmanuel F.C vs DIT F.C. Imajen/LFTL

Díli, 21 Juñu 2026 (RAFA.TL)- Ekipa Kampeaun Kopa FFTL 2026, Emmanuel F.C rekolla viória iha jordana datoluk Liga Timorense Primeira Divizaun hafoin halakon nia adversáriu DIT F.C ho score mihis 2-1.

Jogu entre ekipa rua ne’ebé halao iha Estádiu Díli, Domingu (21/06/2026), Ekipa rua halo kontra atake maka’ás ba malu iha inisiu primairu parte. Maibé, DIT F.C hetan oportunidade iha minutu hitu hodi halo ameasa. J

ogadór Kouda Affo Mah simu bola husi José Santos no kontinua lansa suta maka’ás  iha grande árae adversáriu, maibé sei bele tebe sai husi Jogadór defensivu Emmanuel F.C.

Ekipa DIT F.C kontinua halo presaun iha minutu ba minutu, maibé Emmanuel F.C  responde kedas ho golu ida iha minitu 15 liu husi Jogadór Jhon Lawani hodi muda score ba 1-0.

Hafoin golu ne’e obriga DIT F.C kontinua esforsu atu halo empata, no hetan bola oportunidade ida iha área grande laran, maibé jogadór Kouda Affo Mah la konsege aproveita bola ne´e ho másimu hodi marka golu tanba defeza adversáriu sei bele satan ho di’ak.

Ekipa rua kontinua hatudu sira nia jogu ho agresividade ne’ebé iha. Emmanuel F.C iha ambisaun atu aumenta golu, maibé ekipa rua mantein ho score ne’ebé iha no to’o intervallu.

Tama ba segunda parte, DIT F.C halo kedas ameasa liuhusi jogadór José Santos liu husi sutu maka’ás iha grande área Emmanuel, maibé bola kona deit poste.

Esforsu DIT F.C nian konsege hetan rezultadu iha minutu 56 liu husi avansadu José Santos ne’ebeé marka golu ba nia ekipa hodi munda score ba 1-1 hafoin aproveita asistensia husi nia kompatriota  jogadór Elvis da Silva iha grande area adversáriu nian.

Emmanuel F.C halo kedas jogu ida ho agresividade hodi buka atu marka segundu golu hodi muda score iha tabela no tama ba minutu 70 Emmanuel F.C marka golu segundu liu husi Avansadu Rivaldo Correia hodi muda score ba 2-1.

Tama ba minutu ikus jogu nian, DIT F.C konsege lansa atake no fó presaun ba adversáriu, maibé ekipa rua mantein ho score ne’ebé iha too jogu termina.

Ho rezultadu ne’e, Emmanuel F.C rekolla pontu neen husi jogu tolu, manan rua no lakon ida, enkuantu DIT F.C rekolla pontu tolu husi jogu tolu, manan ida no lakon rua.

Jornalista: Marito da Costa/Editór: Vito Salvadór