Prezidente Repúblika Simu Karta Kredensiál Husi Nasaun Sia Nia Embaixadór

Prezidente Repúblika (PR), José Ramos-Horta, simu Karta Kredénsial husi nasaun sia nia embaixadór ne’ebé la’ós rezidénsia iha Timor-Leste, Segunda (16/03/2026). Imajen/Rafa.tl

DÍLI, RAFA.tl– Prezidente Repúblika (PR), José Ramos-Horta, Segunda (16/03/2026), iha Palásiu Prezidensiál, simu Karta Kredénsial husi nasaun sia nia embaixadór ne’ebé la’ós rezidente iha Timor-Leste.

Nasaun sira ne’ebé  nia embaixadór aprezenta kredensiál ba Xefe Estadu Timor-Leste nian mak hanesan;

• Embaixadór Estraordináriu no Plenipotensiáriu Repúblika Arménia, Serob Bejanyan, rezidente iha Jakarta – Indonézia.
• Embaixadór Estraordináriu no Plenipotensiáriu Repúblika Cyprus nian, Nicholas Panayiotou, rezidente iha Jakarta – Indonézia.
• Embaixadór Estraordináriu no Plenipotensiáriu Geórgia, Tornike Nozadre, rezidente iha Jakarta – Indonézia.
• Embaixadór Estraordináriu no Plenipotensiáriu Repúblika Kenya, Wilson Kipngetich Kogo, rezidente iha Canberra – Austrália.
• Embaixadora Estraordinária no Plenipotensiária Repúblika Malta nian, Bernadette Tobin, rezidente iha Roma – Itália.
• Embaixadór Estraordináriu no Plenipotensiáriu Repúblika Islámika Pakistaun, Zahid Hafeez Chaudri, rezidente iha Jakarta – Indonézia.
• Embaixadór Estraordináriu no Plenipotensiáriu Papua Nova Guiné, Simon Wallace Namis, rezidente iha Jakarta – Indonézia.
• Embaixadora Estraordinária no Plenipotensiária Repúblika Sérbia Ivana Golubovic-Duboca, rezidente iha Jakarta – Indonézia.
• Embaixadór Estraordináriu no Plenipotensiáriu Repúblika España, Bernardo de Sicart Escoda, rezidente iha Jakarta – Indonézia.

Serimónia entrega kredensiál ne’e marka inísiu ofisiál ba misaun diplomátika husi Embaixadór sira ne’ebé foin akreditadu ba Timor-Leste no eforsa nasaun nia kompromisu atu promove kooperasaun internasionál no harí ponte ho parseiru sira iha mundu tomak.

Prezidente Repúblika José Ramos-Horta hato’o bem-vindu ho laran-kmanek ba diplomata sira mai Timor-Leste, hodi hato’o apresiasaun nasaun nian ba estabelesimentu formál ba sira-nia lasu diplomátiku. Prezidente hato’o nia kompromisu firme atu hametin liután relasaun bilaterál ho kada nasaun reprezentadu.

“Diversidade hosi nasaun sira ne’ebé halibur iha ne’e ohin hosi ita-nia viziñu besik sira iha Ázia-Pasífiku to’o parseiru sira iha Europa tomak, Médiu Oriente, no sira seluk reflete natureza universál hosi polítika esterna Timor-Leste nian,” Prezidente Ramos-Horta afirma.

“Ami hanesan nasaun ki’ik ida ho fuan boot no perspetiva globál. Ami hein atu servisu besik ho imi ida-idak hodi harí parseria sira bazeia ba respeitu ba malu, prosperidade partilhada, no ami nia hakarak komún ba mundu ida ne’ebé pasífiku no sustentável,” nia tenik.

Prezidente Repúblika subliña importánsia krítiku hosi kolaborasaun internasionál hodi hasoru dezafiu globál sira no promove objetivu komún sira relasiona ho páz, seguransa, no dezenvolvimentu sustentável.

Embaixadór sira hato’o saudasaun kmanek no votu felisidade husi sira-nia Xefe Estadu no governu. Sira reafirma sira-nia dedikasaun atu haburas lasu amizade no esplora dalan foun ba kooperasaun ho Timor-Leste.

Serimónia kredensiál ida-ne’e destaka Timor-Leste nia perfil internasionál ne’ebé buras dau-daun no espansaun kontinua ba ninia relasaun diplomátika sira dezde restaurasaun independénsia iha 20 fulan-Maiu tinan 2002.

Reportajen ekipa Rafa.tl