Prezidente Repúblika Husu Povu Tomak Fó Omenajen Bá FALINTIL

Prezidente Repúblika, José Ramos-Horta. Imajen/Rafa.tl

DILI, RAFA.tl–Prezidente Repúblika, José Ramos-Horta, husu ba povu tomak atu fó omenajen ba as’wain FALINTIL sira, no erói sira ne’ebé mate iha funu laran bá Timor-Leste nia independénsia.

Prezidente Repúblika José Ramos-Horta, Tersa (19/08/2025), liuhosi mensajen bá selebrasaun loron FALINTIL bá tinan-50  hateten, bainhira halibur hamutuk iha rai doben ida-ne’e, atu selebra loron FALINTIL, sempre no liu-liu hanoin bá eroi sira hanesan Nicolau Lobato ne’ebé mate iha kombate.

Ramos-Horta afirma, loron FALINTIL nian mós atu hotu-hotu hanoin bá Timor-oan, mane no feto, joven, ferik no katus, kombatente no la’ós kombatente, ne’ebé mate iha rai-laran.

“Ha’u mós hanoin beibeik ba sakrifisiu ne’ebé ita-nia povu halo, juventude halo no lubuk ida lakon sira-nia vida, barak la kompleta sira nia estudu, no barak mate iha Santa Krús no fatin bara-barak, no to’o ohin loron seidauk hetan sira-nia ruin, no ha’u fiar katak sei bele hetan iha loron ruma,” Prezidente Repúblika José Ramos-Horta hateten iha nia mensajen ba loron aniversáriu FALINTIL ba dala-50 (20 Agostu 1975 – 20 Agostu 2025).

“Admira teb-tebes elementu sira ne’ebé kombate luta tinan 24 nia laran, sira ne’e mak ha’u admira liu. Ha’u koñese luta barak iha mundu ne’e, tinan 24 iha li’ur la tur, la toba deit, sempre estuda kle’an movimentu oin-oin iha mundu no sempre admira teb-tebes Timor nia luta ne’e. Admira erói sira hanesan maun-boot Xanana, Taur Matan Ruak, Lere Anan Timur, no sira seluk ne’ebé hatene bainhira mak luta ne’e remata ho vitória,” Ramos-Horta hateten.

Ramos-Horta tenik dalaruma hahán laiha, sira han buat hotu ne’ebé bele tau iha ibun, tinan ba tinan, no dala-ruma bee laiha, sira tenke hemu bee foer mota-laran nian ka  bee kolam, sira la rende.

Xefe Estadu afirma veteranu sira ne’e merese duni atu hetan respeitu. Veteranu sira ne’ebé fó buat hotu ba povu, nasaun no kontínua haraik aan, la husu buat barak, simples.

“Ita kontínua tau-neon ba sira ne’ebé mate ona, no kontínua tau-matan ba sira ne’ebé sei moris,” José Ramos-Horta haktuir.

Ramos-Horta hatutan, iha veteranu balun mesak loos iha foho, dala-ruma hasoru iha fatin balun, komunidade sira haktuir dehan ne’e veteranu ida, uluk hamutuk ho Komandante ein-Xefe FALINTIL, Kay Rala Xanana Gusmão, maibé seidauk hetan buat ida, dala-ruma tanba nia rasik la hatene atu halo oinsá hakbesik ba instituisaun sira ne’e. Tanba ne’e, tenke buka apoiu veteranu sira ne’ebé haraik aan, la ezije buat ida ba estadu, maibé kontínua fó aan ba estadu ne’e.

“Mensajen ha’u nian mak ida ne’e, hakruuk ba veteranu sira, hakruuk ba FALINTIL, F-FDTL, sira ne’ebé veteranu tinan-24, ha’u la temi naran, ba sira hotu-hotu, hanoin sira ne’ebé sei moris, hakruuk ba sira ne’ebé lakon vida,” Ramos-Horta hateten.

Reportajen ekipa Rafa.tl