Prezidente Repúblika ho Governu Dezeju Natal Ksolok no Rahun Di’ak Tinan Foun Ba Povu Tomak

Preizdente Repúblika, José Ramos-Horta hato'o mensajen Natal iha ámbitu Festa Natal ho Povu iha Palásiu Prezidensiál, Segunda (22/12/2025). Imajen/Rafa.tl

DILI, RAFA.tl– Prezidente Repúblika (PR), José Ramos-Horta hamutuk ho IX Governu Konstitusionál ne’ebé lidera husi Primeiru-Ministru Kay Rala Xanana Gusmão, no líder sira órgaun soberánia nian hato’o dezeju Natal ksolok no rahun di’ak tinan foun ba povu tomak iha teritóriu nasionál no mós iha diáspora.

Notísia Relevante: Prezidente Repúblika no Governu Agradese Povu Tomak Ne’ebé Mantein Pás no Estabilidade

Prezidente Repúblika José Ramos-Horta hato’o boas festas Natal no tinan foun ba povu ne’e iha ámbitu selebrasaun “Natal  ba Povu 2025” ne’ebé hala’o iha Palásiu Prezidensiál, Segunda (22/12/2025).

Iha mensajen Natal Xefe Estadu hato’o haku’ak boot ho ksolok hodi hato’o Boas Festas do Santo Natal no Tinan foun 2026 ba povu tomak, tantu iha rai-laran no rai-liur, no mós ba Timor-Leste nia amigu husi nasaun sira iha Timor-Leste.

“Natal ho domin dame ba Timoroan sira hotu namkari iha rai-laran, iha mundu, ba oan sira hotu-hotu ne’ebé rona ho akompaña transmisaun ida-ne’e sira ne’ebé iha Hospitál, Prizaun Becora, Gleno ho Suai ne’ebá. Sira ne’ebé iha uma liu-liu ferik-katuas sira labele book an, husi ne’e ha’u rasik Primeiru-Ministru, Prezidente Parlamentu, Prezidente Tribunál Rekursu, no mós ita nia amigu ho parseiru sira korpu diplomátiku tomak iha Timor. Ha’u haku’ak boot ba imi ho Natal Kmanek ho domin dame haku’ak boot Natal Kmanek,” Prezidente Repúblika José Ramos-Horta hateten.

Iha fatin hanesan, Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, lori Governu IX nia naran hodi hato’o ba povu tomak ho Ksolok  Boas Festa do Santo Natal ho tinan foun 2026.

“Ha’u reprezenta Governu, agradese ba Prezidente Repúblika ne’ebé kuaze tinan-tinan  organiza hela festa ida-ne’e ba iha komunidade liu-liu ba oan sira. Tinan ida-ne’e tan ne’ebé família sira ferik ho katuas sira no joven sira  selebra Natal hamutuk hanesan momentu espesiál ba reflesaun ba uniaun fraternidade,” Francisco Kalbuadi Lay hateten.

Vise-Primeiru-Ministru hatutan ho tinan  foun 2026  nafatin esforsu hodi lori dezenvolvimentu ba nasaun liu-liu ba povu.  Nafatin kria armonia, páz no estabilidade iha rai laran.

Nia afirma, Natal hanesan loron selebrasaun Kristu Nia moris no mós oportunidade ida atu reafirma kompromisu moris di’ak povu nian no ba dezenvolvimentu nasaun nian.

“Governu kontinua esforsu tomak atu servi povu ida ne’e hodi promove nafatin inkluzaun sosiál, estabilidade no dignidade ba moris di’ak ba Timoroan hotu, nune’e ho respeitu ho espíritu Natal mai ita reforsa ita nia terminasaun atu harí futuru ida ba páz, solidáriu no próspero,” nia tenik.

Francisco Kalbuadi Lay hodi governu nia naran hato’o ba família sira hotu boas festas Natal no tinan foun ba Timoroan hotu-hotu atu Natal ida ne’ebé lori páz, armonia ho esperansa foun.

Iha observasaun ne’ebé Rafa.tl iha haré katak Iha Selebrasaun “Natal ho Povu 2025” hetan animasaun husi artista Timoroan sira, dansa Kulturál husi Estudante sira, no mos fó oportunidade ba negosiante sira hodi lori sira nia produtu ba fa’an.

Reportajen ekipa Rafa.tl