Prezidente FFTL Fó Prémiu Motór ba Adeptu Futeból Ne’ebé Selebra Aniversáriu Natalísiu iha Loron Abertura Taça da Liga

Sekretáriu-Jerál FFTL, José Adilson de C. Ribeiro, akompaña husi Diretór Administrasaun no Parseria Internasionál, Jánio Tilman ho Koordenadór-Jerál Taça da Liga, João F. Da C. Campos entrega motór ba Domisiano Lopes iha FFTL, Tersa (27/01/2026). Imajen/FFTL

DILI, RAFA.tl– Prezidente Federasaun Futeból Timor-Leste (FFTL), Nilton Telmo Gusmão dos Santos, fó prémiu motór ida ho marka Honda Beat ba adeptu futeból ne’ebé selebra aniversáriu natalísiu iha loron abertura Taça da Liga.

Notísia Relevante: FFTL Sei Realiza “Taça da Liga FFTL”, ETO Group Apoiu US$35,000.00

Iha komunikadu ofisiál ne’ebé Rafa.tl asesa husi Gabinete Mídia FFTL, Tersa (27/01/2026), relata Prezidente Federasaun Futeból Timor-Leste (FFTL), Nilton Telmo Gusmão dos Santos, fó motór Honda Beat ida hanesan prémiu ba espetadór ida ne’ebé selebra nia loron moris, koinside ho abertura kompetisaun Taça da Liga iha Estádiu Munisipál Díli iha loron 17 fulan-Janeiru  tinan 2026.

Prezente ne’e nu’udar sinál apresiasaun husi Prezidente FFTL ba adeptu futeból sira ne’ebé marka prezensa no anima serimónia abertura ne’e.

Prezente motór Beat ne’ebé Prezidente FFTL fó ne’e, entrega ofisiálmente hosi Sekretáriu-Jerál FFTL, José Adilson de C. Ribeiro, akompaña husi Diretór Administrasaun no Parseria Internasionál, Jánio Tilman ho Koordenadór-Jerál Taça da Liga, João F. Da C. Campos iha eskritóriu FFTL, iha loron 27 fulan-Janeiru ne’e.

Prezenteadu ba prémiu ne’e maka Domisiano Lopes, moris iha Cassa, Ainaro, iha loron 17 fulan-Janeiru tinan 2003. Momentu ida ne’e hanesan memória espesiál ida ba Domisiano ho nia família, enkuantu aumenta mós emosaun ba eventu Taça da Liga nian.

Reportajen ekipa Rafa.tl