Presu Kombustível Mundiál iha Kuarta-Ne’e Sa’e Ona Ba US$103,42 Kada Barríl

Ilustrasuan presu kombustível. (Pinterest.com)

DÍLI, RAFA.tl– Presu kombustível sa’e liu 2% iha Tersa-feira (17/03/2026), tanba aumenta dúvida sira katak Prezidente Estadus Unidus Amérika, Donald Trump, sei bele organiza koligasaun ida ne’ebé signifikativu hodi akompaña petrolíferu sira liuhosi Estreitu Ormuz nian.

Notísia Relevante: ETO Rejeita Akuzasaun Manipulasaun Presu, Rekorda Kona-bá Presu Kombustível Ne’ebé Sa’e iha Globál

Hanesan relata hosi CNBC, Kuarta-feira, 18 fulan-Marsu 2026, kombustível Brent sa’e 3.2%, ka US$3,21, hodi ba ona iha  presu US$103.42 kada barríl. Entretantu, petróleu brutu Estadus Unidus Amérika nian sa’e 2,9%, ka US$2,71, hodi taka ho  US$96,21 kada barríl.

Molok ne’e, iha Tersa-feira, 17 fulan-Marsu ne’e, Reuters, fó sai katak, futuru Brent nian sa’e maka’as US$2.48, ka  2.5%, ba US$102.69 kada barríl iha tuku 00:58 GMT. Entretantu, petróleu brutu US West Texas Intermediate (WTI) sa’e US$2.42, ka 2.6%, ba US$95.92 kada barríl.

Iha publikasaun iha mídia sosiál Donald Trump hatete aliadu sira NATO nian lakohi partisipa iha funu ida hosi Estadus Unidus Amérika hasoru Iraun. Nune’e, Trump rasik afirma katak Estadus  Unidus Amérika la presiza ajuda hosi nia aliadu sira.

Estadus Unidus Amérika husu ona ba nia aliadu sira atu haruka forsa militár sira hodi proteje tráfiku petrolíferu sira liuhosi estreitu. Movimentu ró nian liuhosi dalan ró nian ne’ebé importante tebes ne’e monu maka’as hafoin atake Iraun nian, ne’ebé hamosu interupsaun boot liubá fornesimentu petróleu globál iha istória.

“Eskala boot hosi interupsaun fornesimentu kombustível nian halo susar ba merkadu atu hetan solusaun ida ne’ebé adekuadu,” Warren Patterson, Xefe Estratéjia Merkadoria ING hateten.

“Enkuantu administrasaun Estadus Undidus Amérika nian promove ona ideia kona-bá kobertura seguru no eskoltu naval sira, ida mós la materializa,” Patterson hatete.

Nia hatutan tan katak eskolta ró komersiál sira liu husi Estreitu Ormuz nian sei husik ró naval sira sai vulneravel ba atake, nune’e Estadus Unidus Amérika bele atraza asaun hanesan ne’e to’o sente katak Iraun nia abilidade atu lansa atake sira hasoru ró sira hetan erozaun.

Lokaliza entre Oman no Iraun, estreitu ne’e sai hanesan dalan ida ne’ebé importante tebes ba komérsiu globál petróleu nian. Maizumenus barríl millaun 13 kada loron sei liu husi estreitu iha tinan 2025, ne’ebé reprezenta besik 31% hosi fluxu petróleu brutu hotu-hotu iha tasi, haktuir hosi konsultoria enerjétika Kpler.

Reportajen Ekipa Rafa.tl