PR Ramos-Horta Partisipa Enkontru Anuál Fórum Ekonómiku Mundiál 2026 iha Davos-Suisa

PR José Ramos-Horta halo vizita Estadu ba Davos, Suisa, Segunda (19/01/2026). Imajen/Rafa.tl

RAFA.tl – Prezidente Repúblika (PR), José Ramos-Horta, hala’o vizita traballu ba Davos, Suisa, hodi partisipa iha enkontru anuál Fórum Ekonómiku Mundiál husi loron 20 to’o loron 23 fulan-Janeiru 2026.

Fórum Mundiál Ekonómiku tinan ida ne’e ho tema, “Espíritu Diálogu nian”, konvoka líder globál sira husi Governu, emprendedór no sosiedade sivíl hodi partilla dezafiu jeopolítiku, ekonómiku no ambientál sira ne’ebé urjente.

Iha komunikadu ofisiál ne’ebé Rafa.tl asesa husi Gabinete Mídia Prezidente Repúblika, José Ramos-Horta, Segunda (19/01/2026), haktuir  Xefe Estadu nia partisipasaun subliña Timor-Leste nia kompromisu ba envolvimentu multilaterál ne’ebé konstrutivu no ninia papél proativu hodi fornese solusaun kolaborativa sira.

Durante vizita, Prezidente nia kompromisu sira sei foka ba tema krítiku sira relasiona ho dame, kreximentu inkluzivu no rejenerasaun ambientál.

Iha loron 21 fulan-Janeiru, Prezidente Repúblika José Ramos-Horta, partisipa iha diálogu estratéjiku nível aas nian, inklui enkontru informál ida hosi Líder Ekonómiku Mundiál sira (IGWEL) kona-bá “Restaura Espíritu Diálogu iha Mundu ne’ebé fahe malu” no Diálogu ho Parte Interesada sira ho títulu “Tau Emprendedór sira iha Fatin ne’ebé Merkadu laiha.” Prezidente mós sei tuir sesaun ida ne’ebé organiza hosi Globál Citizen no Forbes.

Iha loron  tuir mai, 22 fulan-Janeiru, Prezidente Repúblika José Ramos-Horta, hato’o diskursu prinsipál iha eventu paralelu importante rua; Primeiru, “Plástiku Neutrál Globál: Transforma Poluisaun ba Servisu no Infraestrutura,” sei ezamina hodi transforma krize poluisaun plástiku ba oportunidade ida ba empregu verde no infraestrutura sustentável. Segundu, “Empregu Rejenerativu Millaun 100: Rekonstrui Ekonomia Lokál sira dezde baze liu hosi Sistema Ai-han, Turizmu, no Asisténsia,” sei destaka modelu rejenerativu sira hanesan dalan sira ba restaurasaun ekolojia no ekonomia komunitária sira ne’ebé reziliente.

Itineráriu Prezidente nian inklui série enkontru bilaterál ho figura xave internasionál sira no prezensa iha Jantar Sidadaun Globál.

“Iha mundu ida ne’ebé dalabarak nakfera tanba konflitu no deskonfiansa, ‘Espíritu Diálogu’ la’ós de’it tema ida maibé nesesidade ida. Timor-Leste nia jornada rasik hanorin ita katak pás no prosperidade ne’ebé metin harí liu hosi konversa persistente no respeitoza no kompromisu kompartilhadu ho bem komún. Iha Davos, ha’u sei lori ita nia povu nia lian, advokasia ba kooperasaun globál ne’ebé investe iha dame, fó kbiit ba emprendedór sira, no proteje ita nia planeta ba jerasaun sira iha future,” Ramos-Horta  hateten iha komunikadu  imprensa.

Prezidente Repúblika nia partisipasaun iha Fórum Ekonómiku Mundiál reafirma Timor-Leste nia papél ativu iha diálogu internasionál no ninia dedikasaun ba parseria hodi buka solusaun ba asuntu globál sira.

Reportajen ekipa Rafa.tl