Posibilidade Díli Sai Sentru Ba Kompetisaun Modalidade Lima

Ministru Juventude, Desportu, Arte no Kultura (MJDAC), Nelio Isaac Sarmento.

Díli, 7 Setembru 2026 (RAFA) – Díli iha posibilidade sai sentru ba kompetisaun Festival Nasionál Desportu (FND) 2026 ne’ebe sei partisipa modalidade lima, haesan  futebol, basketbola, voleibol, taekwondo no karate-do.

Ministru Juventude, Desportu, Arte no Kultura (MJDAC), Nelio Isaac Sarmento, hatete maski iha posibilidade estádiu la disponivel tanba prosesu manutensaun ka hadi’a iha fulan-Novembru, komisaun organizadora sei iha opsaun atu garante eventu nasionál ne’e bele lao tuir planeamentu.

Nia mós garante laiha impaktu, tanba FND ne’e eventu nasionál. Bainhira Novembru estádiu seidauk hahú obra sei bele uza, liu-liu ba abertura no karik jogu ida ka rua.

Aleinde ne’e, komisaun organizadora sei koordena ho Federasaun Futeból Timor-Leste (FFTL) kona-baá Kampu Federasaun no Centru Treinamentu Becora bele sai opsaun atu suporta.

“Kompetisaun futeóol ne’e iha responsabilidade federasaun. Entaun, ita iha kampu, bele uza Federasaun nia kampu, bele uza mós Centru Treinamentu Becora. Portantu, ba futeból ne’e di’ak,” Nelio Isaac Sarmento  informa ba jornalista sira, Segunda-ne’e.

Governante ne’e mós garante, modalidade basketbola, voleibol, taekwondo no karate-do la enfrenta problema boot kona-bá  fatin tanba, konstrusaun no preparasaun infraestrutura ba modalidade sira  besik atu remata.

Ba modalidade futsal, komisaun organizadór planeia atu konsentra realizasaun kompetisaun iha Sentru Desportivu Taibesse, ho preparasaun opsaun A no B atu responde ba situasaun ne’ebé bele mosu.

MJDAC daudaun ne’e hein deit dadus partisipasaun husi kada munisípiu, inklui númeru partisipante no modalidade ne’ebé sira sei tuir.

Nia esplika, maski planu inisiál konsidera modalidade 10, dadus rezistu ne’ebé tama to’o agora hatudu katak partisipasaun bele limita deit ba modalidade haat ka lima.

Desizaun final kona-ba númeru modalidade sei bazeia ba rezultadu rezistu no partisipasaun husi munisípiu sira.

Eventu Festival Nasional Desportu  ne’e tuir planu sei realiza  iha fulan-Novembru 2026, no sei partispa husi Atleta  husi munisípiu sira iha Timor-Leste, inklui RAEOA jo Ataúro.

Jornalista: Marito da Costa