POLTRANS Sosializa Lei Tránzitu no Kodigu Estrada Ba Estudante Universitáriu sira

Xefe Departamentu Koordenasaun Jestaun Risku ba Formasaun no Edukasaun Sivika, Superitedenete Asistente Polísia Domingos Sarmento Gama. Imajen/Rafa.tl

DILI, RAFAL.tl– Polisia Tranzitu Seguransa Rodaviaria Nasional (POLTRANS) sosializa Lei Tránzitu no Kodigu Estrada ba Estudante Universitáriu sira iha Dili Institute of Technology (DIT), hodi konsiensializa estudante sira utiliza veíklu no estrada sira tuir lei no orden.

Xefe Departamentu Kordenasaun Jestaun Risku ba Formasaun no Edukasaun Sivika, Superitedenete Asistente  Polísia Domingos Sarmento Gama, ba jornalista sira iha kampus DIT, Sesta (26/09/2025) hateten,  atividade ne’e hala’o ho objetivu atu fó koñesimentu ba estudante sira tanba dala barak estudante sira mak viola  regra tranzitu nian no involve iha asidente tráfiku barak liu.

Nia hatutan, Polísia Tranzitu iha alvu atu sosializa lei tranzitu ba  universitáriu  sira hotu, nune’e bele fó koñesimentu kona-bá lei no regulamentu kódigu Estrada, inklui investigasaun no lejislasaun ba estudante sira hodi  hamutuk  prevene asidente tráfiku.

“Sensibilizasaun lei kodigu Estrada númeru 6/2003, ba ita-nia estdaunte Universitáriu sira, liu-liu iha DIT, ita haree partisipante sira orgullu no entusiazmu hodi akompaña aprezentasaun durante oras rua resin. Signifika estudante sira iha ona vontade atu rona no hatene, no ida,ne’e mak ita husu para sira halo tuir,” Superintedente Asistente Polísia Domingos Sarmento Gama hateten.

Nia informa, kada tinan asidente trafigu ne’e nia numeru sae, tanba ne’e ho sosializasaun ne’e, atu fó koñesimentu ba estudante sira hodi kondus transporte  kuidadu.

Iha fatin hanesan, estudante Mateus da Silva Junior hato’o agradese ba Polísia Tránzitu Seguransa Rodaviaria Nasionál ne’ebé sosiliza no patilla ona kona-bá lei ho regulamentu sira kódigu estrada nian.

“Ami agradese ba autoridade PNTL liu-liu iha diresaun Tránzitu nian bele fahe mai ami koñesimentu sira kona-bá oinsá kondus  motór ka karreta no utiliza dalan sira ho responsabilidade, tuir regra no respeita ba sinais tranzitu ne’ebé iha hodi minimiza ka halakon asidente tráfigu ne’ebé sempre akontese kada loron,” Mateus da Silva Junior hateten.

Estudante ne’e hatutan, sei kontinua fahe koñesimentu ka matéria sira ne’ebé hetan ba estudante sira seluk, inklui ba família sira, atu nune’e, hotu-hotu bele hola konsiénsia ida hodi kumpre regra tranzitu ne’ebé mak iha.

Tuir dadus husi Polisia Tranzitu Seguransa Rodaviaria Nasionál katak, hahú husi fulan-Janeiru to’o fulan-Setembru ne’e, rejsita asidente tráfiku hamutuk 745  no husi númeru ne’e, ema na’in-75 lakon vida, kanek todan na’in-156, no kanek kaman  na’in-453.

Reportajen ekipa Rafa.tl