POLTRANS Husu Loja Sira iha Dili Koloka Guarda Parajen Hodi Regula Transporte no Evita Engrafamentu

Polísia Tránzitu Seguransa Rodoviária Nasionál (POLTRANS) husu loja sira iha Dili laran atu koloka guarda parajen hodi regula transporte sira ne’ebé para iha loja hodi evita engrafamentu. Imajen/Rafa.tl

DILI, RAFA.tl– Polísia Tránzitu Seguransa Rodoviária Nasionál (POLTRANS) husu loja sira iha Dili laran atu koloka guarda parajen hodi regula transporte sira ne’ebé para iha loja hodi evita engrafamentu no fasilita sirkulasaun transporte públiku no privadu iha área sira loja nian.

POLTRANS hato’o deklarasaun ne’e hafoin halo observasaun ba loja sira iha área Audian no Bidau iha Kuarta (10/12/2025), hodi haré fatin parajen iha loja sira ne’ebé identifika la monta guarda  parajen atu regula transporte sira, nune’e labele para arbiru hodi hamosu engrafamentu.

Xefe Departamentu kordenasaun jestaun risku ba formasaun edukasaun sívika, Superintendente Asistente Polísia Domingos Sarmento Gama hatete, sira-nia parte fó atensaun  ba loja na’in sira atu kumpri hodi koloka pesoal seguransa  iha fatin parajen, atu kontrola  transporte sira ne’ebé para arbiru, bainhira la kumpri sei bolu loja na’in sira halo deklarsaun iha Polísia.

“Sira nia pesoal ne’ebé ita fó tiha treinamentu, maibé nia patraun haruka nia hi’it tiha sasán, ita buka nia, afinal nia ba hi’it fali sasán iha armazen laran, ida ne’e signifika sira la kopera, entaun  ita bolu pesoal ne’e, nune’e apartir ohin ba oin, ninia servisu maka diriji iha  estasionamentu, nia sei la ba hi’it tan sasán,” Superintendente Asistente Polísia Domingos Sarmento Gama hateten.

“Estasionamentu ne’e  tuir hotu formasaun, maibé la koloka sira tuir sira nia servisu, bainhira  sira la preokupa hodi koloka pesoal iha estasionamentu, maka ita sei bolu loja na’in ba ita nia fatin hodi halo deklarsaun,” Superintendente Asistente Polísia Domingos Sarmento Gama informa ba jornalista sira iha Audian, Díli, Kuarta (10/12/2025).

Superintendente Asistente Polísia ne’e esplika mós kona-bá parajen iha dalan protokolu ne’ebé antes ne’e avizu ona katak para labele liu minutu lima.

“Nafatin fó avizu ba motorista sira liu husi semaforu sira ne’ebé instala ona iha Kapitál Dili,  husi Diresaun Rotunda Prezidente Nicolau Lobato, Comoro ba to’o iha Ponte B.J Habibie Bidau, ne’e labele halo estasionamentu ka para liu minutu lima,” nia tenik.

Superintendente Asistente Domingos Sarmento Gama afirma, atuasaun Polísia Tránzitu Seguransa Rodoviária Nasionál nafatin halo kontrolu ba  sidadaun sira ne’ebé kondus transporte no para la tuir orden no okupa estrada públiku sira liu oras ne’ebé determina, liu-liu dalan protokolu husi diresaun Rotunda Nicolau Lobato to’o Ponte B.J. Habibie Bidau sei halo aprensaun no selu koima.

Reportajen ekipa Rafa.tl