Polísia Tránzitu Prende Karreta Rua no Motór Tolu Tanba Motorista Laiha Karta Kondusaun

Polísia Tránzitu Seguransa Rodoviária Munisípiu Díli halo pasa revista (checkpoint) ba transporte sira ne’ebé halo movimentu transporte iha kapital Dili, Tersa kalan (21/10/2025). Imajen/Rafa.tl

DILI, RAFA.tl– Polísia Tránzitu Seguransa Rodoviária Munisípiu Díli, Tersa-kalan (21/10/2025), halo pasa revista (checkpoint) ba transporte sira ne’ebé halo movimentu ka sirkulasaun iha kapital Dili, konsege prende karreta rua no motorizada tolu tanba motorista laiha karta kondusaun, no prende mós dokumentu karreta no motor 11 tanba inválidu.

Notísia Relevante: PNTL Hahú Halo Operasaun La’o Ain Hodi Alerta Ba Joven sira Labele Distúrbiu Orden Públiku

Komandante PNTL Munisípiu Dili,  Superintendente Xefe Orlando Gomes hatete pasa revista ne’ebé Polísia Tránzitu Seguransa Rodoviária  hala’o ne’e hodi haree transporte sira ne’ebé laiha dokumentu no dokumentu la kompletu, inklui motorista sira ne’ebé kondus veíkulu maibé laiha karta kondusaun.

“Ita sei halo patrullamentu hamutuk ho Tránzitu atu haré kona-ba movimentu  transporte sira ne’ebé kontra regra iha tempu kalan nian, balun ne’ebé mak la uza kapasete, la uza asesoria karreta no motór nian,” Komandante PNTL Munisípiu Dili Superintendente Xefe Orlando Gomes  informa ba jornalista sira  iha Komandu PNTL Munisípiu Dili.

Iha fatin hanesan Komandante Operasaun Munisípiu Dili, Superintendente Assistente José Luís Amaral hateten motorizada barak lakon iha Kapital Dili no ho  operasaun pasa revista ne’e hodi bele identifika transporte sira liu-liu motorizada sira ne’ebé lakon.

“Tránzitu halo checkpoint tanba ikus ne’e motór mós lakon barak, nune’e husi checkpoint ne’e mak ita bele identifika na’in ba transporte sira, aproveita ho situasaun ida ne’e ita bele kaer na’okten balun,” Superintendente Assistente Polísia José Luís Amaral afirma.

Iha operasaun pasa revista ne’ebé Polísia Tránzitu Munisípiu Dili halo iha área Estádiu Munisipál Dili ne’e identifika no prende  karerta rua, motorizada tolu dokumentus 11 no Polísia Tránzitu pasa kedas invoice banku nian ba motorista sira hodi ba selu iha banku hafoin sira bele foti fali sira-nia transporte.

Reportajen ekipa Rafa.tl