Polísia La Tolera Kontentór no Karreta Pezadu Halo Movimentu Iha Tempu Loron

Xefe Seksaun Tránzitu Munisípiu Díli, Superintendente Asistente Polísia Afonso da Silva. Imajen/Rafa.tl

DÍLI, RAFA.tl– Xefe Seksaun Tránzitu Munisípiu Díli, Superintendente Asistente  Polísia Afonso da Silva hatete, autpridade Polísia Tránzitu  la tolera kontentór no karreta pezadu sira  halo movimentu iha tempu loron iha Díli laran.

Superitendente Asistente Polísia Afonso da Silva, informa  Rafa.tl, Kuarta (11/03/2026), katak medida ne’ebé autoridade Polísia Tránzitu foti hodi bandu karreta pezadu no kontentór sira halo operasuan iha loron atu prevene engrafamentu ne’ebé dala barak akontese iha oras servisu no oras movimentu públiku aas.

Regra ka oráriu ne’ebé Polísia aplika ba karreta pezadu no kontetór sira bele halo movimentu  iha oras ne’ebé determinadu, husi tuku 19:00  to’o tuku 06:00 madrugada.

“Kontentór sira tuir lei despaixu governu nian, katak kuandu sira halo servisu komesa husi tuku 19:00 to’o tuku 06:59 dadeer. Kuandu liu oras determinadu labele halo movimentu no Polísia Tránzitu hetan sempre prende hodi aplika koima,” Superintendente Asistente Polísia Afonso da Silva informa.

Nia  hatutan, iha kompañia haat maka husu autorizasaun husi Polísia Tránzitu ba karreta pezadu sira halo movimentu iha tempu loron, tanba sira utiliza ba projetu emerjénsia sira iha Díli laran.

“Kontentór la autoriza para sira halai iha loron, tenke halai iha kalan, agora dau-dauk ne’e karreta pezadu sira halai, tanba utiliza hela ba projetu emerjénsia sira ne’ebe halo alargamentu ba estrada, iha kompañia lima hanesan ne’e,” nia tenik.

Superintendente Assistente Polísia ne’e hatutan, regra bandu kontentór no karreta pezadu sira ne’e bazeia ba despaixu konjuntu artigu 100, no banhira sirkulasaun sira kontra despaixu ne’e sei aplika koima ho valor  US$75.00.

Reportajen ekipa Rafa.tl