Polísia Kontinua Investiga Kazu João Gomes Ne’ebé Mate Mistériu

Komandante Polísia Eskuadra Vera-Kruz, Inspetór Xefe Polísia, Ernesto da Costa Guterres. Imajen/Rafa.tl

DILI, RAFA.tl– Komandante Polísia Eskuadra Vera-Kruz, Inspetór Xefe Polísia, Ernesto da Costa Guterres hatete, autoridade seguransa kontinua halo investigasaun ba sidadaun João Gomes ne’ebé mate mesak ka mate mistériu iha Aldeia Terus na’in, Suku Vila-verde, Postu Administrativu Vera-Kruz, Munisípiu Dili.

Inspetór Xefe Polísia, Ernesto da Costa Guterres, ba Rafa.tl, Kuarta (03/12/2025), hateten mate-isin João Gomes hanesan abitante Munisípiu Ataúro ne’e iha hela prosesu autópsia nia laran.

João Gomes, mate iha uma-laran durante loron-tolu ona iha Ailok-laran, Aldeia Terus na’in Suku Vila-verde no komunidade sira deskobre tanba sente is no lalar hobur iha uma laran hodi  hato’o kedas ba Xefe Aldeia, nune’e komunidade sira ba kedas Eskuadra  Polísia Vera-Kruz no autoridade seguransa ho FORENSIK to’o kedas iha fatin akontesimentu hodi evakua mate-isin ba Ospitál Nasionál Guido Valadares (HNGV).

“Akontesimentu  ne’e  komunidade sira la hatene, bainhira komunidade sira sente is ho lalar hobur nakonu iha uma laran sai mai liur, entaun sira informa ba Xefe Aldeia. Tuir informasaun, sidadaun ne’e nia família laiha, nia hela mesak, nia fen no oan mós laiha,” Inspetór Xefe Polísia, Ernesto da Costa Guterres.

Nia hatutan, agora dau-daun seidauk bele fó rezultadu kona-bá ninia mate ne’e tanba iha hela prosesu autópsia nia laran. Tanba ne’e mak investigasaun iha relatóriu nia laran seidauk hatete katak nia mate tanba saida.

“Tuir informasaun, ne’ebé mak ita hetan husi viziñu sira, sidadaun nia família la iha, no sidadaun ne’e la’ós orijen Suku Vila-Verde. Nia orijen  husi Ataúro, husi parte Suku Makili,” Inspetór Xefe Polísia, Ernesto da Costa Guterres haktuir.

Komandante Eskuadra Vera-Kruz subliña, agora dau-daun liu hosi relatóriu, haruka ona ba komandu para depois bele komunika ho nia família, tanba nia orijen hosi Ataúro, ne’ebé sei liga ba autoridade Polísia sira Ataúro oinsá mak bele aproxima ho família ne’ebé koñese matebian ne’e karik,  bele mai haré mate isin, karik família iha Díli bele lori ba, depende ba  prosesu.

Reportajen ekipa Rafa.tl