Polísia Husu Motorista Nafatin Kumpri Kódigu Estrada no Bandu Tula Pasajeiru Liu Karreta Nia Kapasidade

Transporte públiku sira estasiona iha fatin estasionamentu Becora, Díli. Imajen/Rafa.tl

DILI, RAFA.tl – Polísia Nasionál Timor-Leste (PNTL) liu husi Unidade Polísia Tránzitu Seguransa Rodoviária Nasionál (POLTRAZ), alerta ba motorista atu nafatin kumpri kódigu estrada no bandu tula pasajeiru liu karreta nia kapasidade ne’ebé bele hamosu asidente no dezastre sira.

Unidade POLTRAZ, liu husi Xefe Departamentu Koordenasaun Jestaun Risku ba Formasaun Edukasaun Sívika, Superintendente Asistente Polísia Domingos Sarmento Gama ba Rafa.tl iha Rotunda Elemloi, Comoro, Tersa (30/12/2025), husu ba motorista sira ne’ebé lori transporte públiku, hanesan bus ho mikrolete ho  angguna sira atu nafatin kumpri regra tránzitu, nune’e tula pasajeiru labele liu karreta nia kapasidade.

Lei númeru 6/2003 iha artigu 54 númeru 2, 3 ho 4 regula kona-bá Transporte Públiku sira ne’ebé tula pasajeiru tuir kadeira ne’ebé iha. Hanesan, Bus tula pasajeiru to’o ema na’in-24, labele liu, bainhira tula liu husi ne’e viola ona kódigu estrada artigu 54.

“Ita preokupa ba loron feriadu sira hanesan ne’e volume pasajeiru ba munisípiu ho númeru boot, tanba ne’e, ita husu nafatin ba motorista sira, liu-liu ba motorista sira ne’ebé lori transporte públiku ne’ebé tula pasajeiru sira viajen Díli ba munisípiu no munisípiu sira mai Díli, nafatin respeitu kódigu estrada,” Superintendente Asistente Polísia Domingos Sarmento Gama hateten.

Nia  husu ba motorista sira ne’ebé lori karreta hanesan Bus, Mkcrolete ho Carry sira ne’ebé para iha area estasionamentu (terminal) Becora, Taibessi ho Tasi-Tolu nafatin kumpri lei tránzitu hodi evita dezastre no asidente sira.

Iha parte estasiionamentu transporte públiku nian iha Kapitál Díli, PNTL anunsia ona informasaun liu husi mídia sira hanesan rádiu, televizaun sira no média online sira atu  motorista sira nafatin kumpri lei kódigu estrada liu-liu iha artigu 54.

Candido Hornai, nu’udá motorista ba Rafa.tl iha estasionamentu transporte públiku iha Becora hatete, nu’udar  motorista Bus Baucau nafatin kumpri regra tránzitu nian no sei tula pasajeiru tuir kapasidade karreta nian.

“Tránzitu fó hatene ona ami labele tula liu kapasidade transporte nian no ami kumpri, maibé ami nia preokupasaun mak Diresaun Nasionál Transporte Terrestre (DNTT)  ho Polísia Tránzitu tenke kontrola mós karreta balun ne’ebé la hatún ema iha fatin estasionamentu hodi lori tama ba iha laran,” Candido Hornai hateten.

Francisco Almeida Ribeiro, nu’udár mós motorista husi Turiskai esplika katak, durante ne’e parte Polísia Tránzitu apela ona ba sira atu nafatin kumpri kódigu estrada.

“Ami kumpri tula pasajeiru tuir kapasidadade karreta nian, maibé ema barak hadau malu sa’e, ita obriga mós sira nafatin sa’e tanba diresaun ami nian Turiskai ne’e dook, ne’ebé ami tula ne’e karreta carry nian ema na’in 20. Dalaruma barak liu ida ne’e ami haruka tun fali, tanba ami ta’uk regra, ami tenke halo tuir,” Francisco Almeida hateten.

Tuir observasaun Rafa.tl iha terenu  hatudu katak, karreta iha estasionamentu transporte públiku iha Becora ho Taibesi,  motorista sira nafatin tula ema barak hodi fila ba munisípiu hodi selebra tinan foun hamutuk ho Família.

Iha terenu mós haré katak Polísia Nasionál Timor-Leste (PNTL), liu husi Unidade Polísia Tránzitu Seguransa Rodoviária Nasionál mantein fó seguransa másimu hodi halo kontrolu ba transporte públiku sira ne’ebé tula pasajeiru, atu nune’e, labele liu kapasidade karreta nian, hodi nune’e, bele asegura pasajeiru sira seguru to’o fatin destinasaun.

Reportajen ekipa Rafa.tl