Polísia ho Veteranu Nia Oan Na’in-143 Tama iha Lista Teste Médiku Vaga PNTL

Kanddiatu PNTL sira husi Munisípiu Aileu hahú tuir teste fizika iha Akademia Polísia, Comoro, Dili. Imajen/Dok.Rafa.tl

DÍLI, RAF.tl- Prezidente Komisaun no Suprevizaun Fiskalizasaun ba Revizaun Rekrutamentu Polísia Nasionál Timor-Leste (PNTL) tinan 2025,  Paulo Assis Belo, informa   durante semana ida ho balun, komisaun revizaun identifika husi lista númeru 400 ne’ebé kontinua ba faze teste médiku vaga PNTL 2025 ne’e indentika  polísia no veteranu nia oan hamutuk 143 mak liu.

Notísia Relevante: Deskonfia iha Indísiu Familiarizmu, PDHJ Sei Halo Fiskalizasaun Ba Rezultadu Teste Kadetes PNTL

Númeru 143 lista naran kandidatu PNTL ne’ebé atu hakat ba faze teste médiku ba vaga 400 iha PNTL ne’e,   kompostu husi Polísia nia oan na’in-71 no veteranu nai oan ka jerasaun patrioata  hamutuk na’in-72.

Paulo Assis Belo, ba jornalista sira iha Sentru Formasaun Polísia (CFP-sigla portugés) Díli, Kinta (12/03/2026), informa Komisaun foin hahú servisu iha loron 26 fulan-Fevereiru liubá, hodi konvoka primeiru reuniaun no dadaun ne’e Komisaun komesa revé fali prosesu sira ne’e, revé uluk sira 400 liu ne’e hodi haré iha failansu ka la iha failansu, iha manipulasaun ka lae no buka komprova alegasaun sira katak rerkutamentu ne’e iha tendésiu familiarismu ka la iha familiarismu.

”Maneira revé ne’e haré notas sira ne’ebé públiku fó sai ne’e, no notas sira orijinál ne’e, prova ne’ebé sira halo ne’e iha akordu duni ka lae, ka iha manipulasaun. Ida-ne’e mak Komisaun haré,” Paulo Assis Belo tenik.

Nia dehan Komisaun sei haré reklamasaun sira ne’ebé tama, mézmu kuantidade ladún barak ida, purvolta reklamasaun 200 de’it ne’ebé kestiona rekrutamentu PNTL 2025 ne’e nakonu ho prátika nepotismu no familiarizmu.

Kompozisaun membru Komisaun ne’e kompostu husi reprezentante Jerasaun Patriota (JP), membru na’in-rua Parlamentu Nasionál (PN) reprezentante husi  Prezidénsia Repúblika, Provedoria Direitus Humanus no Justisa (PDHJ) , reprezentante Komisaun  Funsaun Públika (CFP), Guarda Nacionál Repúblicana (GNR) na’in ida  ho na’in ida tan husi Austrália.

“Ita haré lai kona-ba iregularidade ne’e boot ka oinsá. Komisaun la foti desizaun, maibé sei submete relatóriu ba governu hodi lori ba aprezenta iha reuniaun  Konsellu Ministru (KM) atu bele foti desizaun kona-bá anula totál ka anula parsiál ga ne’e governu mak halo,” nia tenik.

Komisaun so halo tuir de’it mandatu ne’ebé governu fó mai halo revizaun bá prosesu hotu-hotu, haree fallansu  hafoin relata ba governu foti desizaun.

To’o agora haree ba hanesan iha munisípiu hotu polísia sira ne’e kuaze nia oan iha duni, maibé atu okupa númeru ki’ik husi  01-10 ne’e, lae, balun iha númeru boot no balun iha númeru ki’ik.

Paulo Assis Belo informa maske agora  dadus ne’ebé komisaun rekrutamentu fó mai ne’e nain 71 mak polísia nia oan, maibé komisaun revizaun sei halo nafatin investigasaun tebes ka lae na’in 71 ne’e de’it no nune’e mós jerasaun patriota nain 72.

Iha insiu rekrutamentu PNTL 2025 ne’e Governu fó kuota 20% ba polísia nia oan no 20%  ba jerasaun patriota, maibé PDHJ foti problema ne’e ba iha Tribunál Rekursu, deklara katak ne’e inkonstitusionál ne’ebé Kuota ne’e la aplika ona, signifika sira hotu-hotu iha direitu atu bele kandidata an ba polísia.

Paulo Assis Belo informa, iha rezolusaun ba revizaun ne’e loron 20, nune’e sura husi reuniaun primeiru iha loron 26 fulan-Fevereiru tinan 2026 ne’e signifika katak 27 fulan-Marsu ne’e,  komisaun tenke entrega ona relatóriu ba governu.

Reportajen ekip Rafa.tl