PNTL Simu Informasaun husi CEO ETO Group Nilton Telmo Gusmão dos Santos Hodi Ba Halo Inspesaun Ba Kompañia Capital Venture Timor-CVT

Porta-vós Komandu Jerál PNTL, Superintedente Polísia João Belo dos Reis (klaran) halo konferénsia imprensa hodi klarifika inspesaun ba kompañia Capital Venture Timor-CVT iha piso lima (andár 5), Torre ETO. Imajen/Rafa.tl

DILI, RAFA.tl – Porta-vós Komandu Jerál  Polísia Nasionál Timor-Leste (PNTL),  Superintedente Polísia João Belo dos Reis, Kinta (11/12/2025), konfirma katak prezensa ekipa konjunta hodi halo inspesaun ba kompañia Capital Venture Timor-CVT tanba simu informasaun direta husi CEO  grupu  empreza Esperança Timor Oan (ETO), Nilton Telmo dos Santos Gusmão.

Notísia Relevante: Deskonfia Loke Jogu Online, Polísia Halo Inspesaun Ba Kompañia Capital Venture Timor-CVT iha prédio Torre ETO

Ekipa konjunta ne’ebé halo inspesaun ba empreza Capital Venture Timor-CVT ne’ebé halo arrendamentu ba piso lima (andár 5) iha  prédio Torre ETO, Mandarin, Dili, Kuarta (10/12/2025), kompostu husi PNTL liuhosi Diresaun Servisu Informasaun Kriminál  (DSIK), Servisu Migrasaun, Polísia Forensik ho Polísia Siéntifiku  Investigasaun Kriminál (PCIC, sigla portugés).

Porta-vós Komandu Jerál PNTL, Superintedente Polísia João Belo dos Reis, konfirma tan, katak Polísia mak simu  duni informasaun husi CEO ETO, Nilton Telmo dos Santos Gusmão, ne’ebé  deskonfia  kompañia Capital Venture Timor-CVT hala’o atividade jogu online iha piso lima ( andár 5) prédio Torre ETO.

“Ho informasaun CEO ETO nian ne’e maka ekipa PNTL  ne’ebé lidera husi Komandante Operasaun Diresaun Servisu Investigasaun Kriminál, Superintendente Asistente Polísia Mouzinho Tavares Correa,  ba kedas halo inspesaun hodi halo investigasaun no rekolla evidénsia sira iha kompañia Capital Venture Timor-CVT,” Superintendente Polísia João Belo dos Reis hateten iha konferénsia imprensa iha Ministériu Interiór, Vila-Verde, Dili.

“Hakarak hadi’a informasaun ne’e katak, na’in ba empreza grupu ETO mak informa ba polísia katak, utilizadór piso lima (andár 5) deskonfia halo atividade jogu online, entaun kooperasaun na’in ba ETO Sr. Nilton mak fó informasaun ba Polísia atu halo intervensaun, ne’ebé laloos kuandu indika fali ba ETO mak fasilita,” Superintedente Polísia João Belo dos Reis  klarifika.

Nia informa mós katak rezultadu investigasaun husi inspensaun ne’ebé halo prosesu lao hela, faze tuir mai bolu jerente sira kompañia  Capital Venture Timor-CVT ne’ebé mak deteta  iha piso lima  Torre ETO, atu nune’e,  halo fali fiskalizasaun ba dokumentu sira ne’ebé mak sira iha hodi bele prosesu ba Ministériu Públiku.

“Internvensaun ekipa konjunta nian atu deteta  katak, iha ne’ebá akontenese buat ruma ne’ebé presiza iha atensaun hosi Estadu.  Nu’une’e, Polísia xave no dada kedas liña polísia iha piso lima (andár 5) ne’ebé mak  kompañia  Capital Venture Timor-CVT arrenda hodi halo eskritóriu servisu,” nia hateten.

Superintendente Polísia João Belo dos Reis hatutan sidadaun sira ne’ebé iha kompañia CVT ema balun husi Olanda, Indonézia, Filipina no Tailándia, ne’ebé dokumentu ho ekipamentu ba sira nia lisensa suspende ona.

João Belo dos Reis konfirma mós katak  kompañia  Capital Venture Timor-CVT iha duni lisensa, mas bainhira lisensa ne’e sira hatama atu halo  jogu online iha inisíu mas kuadu rezolusaun  Governu nian vigora hodi suspende ka taka hotu atividade jogu online, maka lisensa sira jogu online ne’e inválidu, katak lisensa sira ne’e ilegál.

Reportajen ekipa Rafa.tl