PNTL Kontinua Prosesu Investigasaun ba Inséndiu Tasi-Tolu Ne’ebé Rezulta Kazal Ida Lakon Vida

Kazal ida lakon vida iha inséndiu ne'ebé akontese iha Tasi-Tolu, Domingu dadeer (25/01/2026). Imajen/Rafa.tl

DILI, RAFA.tl– Porta-voz Komandu Jerál Polísia Nasionál Timor-Leste (PNTL), Superintendente Polísia, João Belo dos Reis, informa  iha inséndiu ka ahi-han uma ida iha parte Tasi-Tolu, Domingu madrugada (25/01/2026), ne’ebé rezulta kazal ida mate sei iha prosesu investigasaun hodi hatene motivu lolós husi inséndiu ne’e rasik.

Superintendente Polísia, João Belo dos Reis, informa ba jornalista sira iha Kuartel Jerál PNTL, Caicoli, Díli, Segunda (26/01/2026) hateten, iha Domingu (25/01/2026), hale’u tuku 06 Otl, mosu sirkuitu husi fiu balun hodi hamosu inséndiu iha Tasi-Tolu hodi rezulta sidadaun na’in-rua   (kazal ida) ahi han to’o mutuk.

“Motivu husi inséndiu ne’e sei iha faze investigasaun nia laran, ne’ebé ami seidauk bele publika tanbasá buat ne’e akontese,” Superintendente Polísia, João Belo dos Reis hateten.

Porta-voz Komandu Jerál PNTL ne’e haktuir, mate isin, Domingu ne’e kedas evakua ba Ospitál Nasionál Guido Valadares (HNGV) hodi halo autópsia ne’ebé ninia identidade  seidauk bele fó sai agora, tanba  seidauk iha informasaun sufisiente husi parte Forensik nian hodi publika.

“Iha informasaun ne’ebé mak ita rekolla husi vítima nia oan katak, akontese sirkuitu, maibé informasaun sira ne’e ita sei ke’e kle’an liu kauza ka motivu tanba saida mosu, karik buat seluk akontese orsida investigasaun mak sei buka tuir,” Nia informa.

Superintendente Polísia, João Belo dos Reis subliña, ekipa PNTL sei kontinua hakle’an investigasaun ba kazu inséndiu ne’ebé akontese iha Tasi-Tolu ne’e hodi hatene motivu lolós molok halo fali divulgasaun informasaun ba públiku iha tempu tuir mai.

Reportajen ekipa Rafa.tl