PNTL Kontinua Buka Tuir Suspeitu Ne’ebé Soke Evangelina iha Becusse

Komandante PNTL Munisípiu Dili, Superintendente Xefe Polísia Orlando Gomes. Imajen/Rafa.tl

DILI, RAFA.tl- Polísia Nasionál Timor-Leste (PNTL) Munisípiu Dili kontinua buka tuir suspeitu ne’ebé kondús  motór ho marka Genio soke Evangelina iha Becusse to’o hetan kanek iha parte ulun.

Tuir kronolojia, suspeitu ne’ebé lori motorizada Genio husi diresaun Eskola Teknika Vokasionál ka STM Becora ba Becusse, no soke Evangelina iha área Becusse. Hafoin asidente ne’e, suspeitu laiha responsabilidade, husik Evangelina monu iha estrada laran no hetan kanek iha parte ulun.

Komandante PNTL Munisípiu  Díli, Superintendente Xefe Polísia Orlando Gomes,  orienta ona membru sira hodi buka tuir suspeitu ne’ebé soke alin Evangelina iha Becusse, ne’ebé laiha responsabilidade hodi halai lakon.

Nia haktuir, vítima iha ona Ospitál Nasionál Guido Valadares (HNGV, sigla portugés), hodi halo tratamentu atu garante nia saúde bele iha rekuperasaun ho lalais.

“Suspeitu  ita sei buka nafatin, tanba suspeitu soke hotu halai. Polísia ko’alia ho ita nia komunidade sira iha ne’ebá  tanba sira iha CCTV, nune’e ita bele buka tuir, liu husi CCTV ita lansa nafatin ita-nia membru sira para buka tuir nafatin suspeitu ninia paradeiru,” Superintendente Xefe Polísia Orlando Gomes ba Jornalista sira iha Komandu Jerál PNTL, Tersa (10/12/2025).

Superintendente Xefe Polísia ne’e hatutan, parte Polísia Tránzitu Dili simu ona keixa husi inan-aman, ho ida ne’e, ekipa PNTL liuhosi Diresaun Servisu Investigasaun no Tránzitu ba ona iha terrenu hodi rekolla  informasaun hotu relasiona ho asidente ne’e.

“Hosi labarik nia inan-aman hato’o ona keixa ba iha Tránzitu no Tránzitu mós ba haré ona labarik iha Ospitál, kontaktu ona ho inan-aman sira, kuandu sira hetan informasaun ruma liga ho suspeitu sei informa mai Polísia hodi foti medida,” nia hateten.

Superintendente Xefe  Polísia Orlando Gomes esplika, parte Investigasaun Komandu Díli halo ona koordenasaun ho Diresaun Nasionál  Transporte no Terestre (DNTT) hodi rekolla  evidénsia iha CCTV, nune’e bele hatene klaru suspeitu nia identidade lolós ne’ebe utiliza motorizada ho marka Genio ne’e.

Reportajen ekipa Rafa.tl