PNTL Identifika Involku ho Projetil Bidón Tolu Tama husi Portu Tibar

Kilat-musan nia rahun iha bidon-tolu ne'ebé Polísia asegura, foin lalais ne'e, iha armazén ida iha Tibar. Imajen/Espesiál

DILI, RAFA.tl – Polísia Nasionál Timor-Leste (PNTL)  halo ona identifikasaun ba involku ho projetíl  hamutuk bidón tolu iha armazén impreza nasionál nian ida iha  Tibar, Postu Administrativu Bazartete, Munisípiu Liquiça.

Notísia Relevante: PNTL-SNI Asegura Involku ho Projetíl Bidon 36 iha Kontentór Ida Nia Laran

Involku ho projetíl ne’e tama mai Timor-Leste liu hosi Portu Tibar husi fatin orijen Estadus Unidus Amérika liu mai Singapura no distinasaun ikus iha Timor-Leste.

Portavós PNTL Superintendente Polísia, João Belo dos Reis hateten, informasaun  ne’ebé espalla katak involku no projetil ne’ebé tama ilegál mai iha teritóriu nasionál la’os bidón 36, maibé  bidón neen tolu (3) ne’ebé kompostu husi kílat-musan iha bidón tolu no kílat-musan rahun iha karól sementi fatin tolu.

Nia esplika, PNTL halo ona identifikasaun ba objetu ilegál sira ne’e no PNTL asegura ona hodi dada fita Polísia nian ba  iha kontentór ne’ebé iha evidénsia sira, hanesan involku no projetíl iha Tibar.

“Ita atu dehan informasaun ne’e presiza halo loos katak bidón tolu maka iha kílat-musan uzadu, depois kílat-musan rahun iha karón sementi fatin tolu. Tamba ne’e PNTL sei kolabora hamutuk parseiru internasionál atu  halo ezaminasaun ba objetu sira, atu bele hatene nia risku,” Hateten Superintendente Polísia João Belo dos Reis ba jornalista sira iha Komandu Jerál PNTL, Dili, Tersa (14/10/2025).

Portavós PNTL mós klarifika katak tuir deklarasaun husi kompañia katak sasán sira ne’e sira halibur lori hatama mai atu halo fali ba metal ka alumíniu, maibé hanesan hatete ona katak PNTL sei halo investigasaun kle’an no husu apoiu ba parseiru sira hodi bele deskobre didi’ak ho aparellu ne’ebé iha hodi hatene nia risku ne’e oinsa para bele deskobre nia perigu ba futuru.

Kona-ba destakamentu autoridade seguransa iha Portu Tibar, Superintendente Polísia ne’e klarifika katak, antes ne’e Komandu Jerál PNTL husu ona autorizasaun hodi destaka membru Polísia iha Portu Tibar, nune’e halo kontrolu másimu ba sasán sira ne’ebé tama no sai iha Portu Tibar.

“Ami autoridade seguransa husu kleur tiha ona, atu destaka ami nia ekipa iha Portu Tibar, hodi nune’e manifesta ka dokumentu hotu-hotu, ita bele kontrola no hatene sasán saida mak  tama liu husi scam ka lae, para saida de’it mak fo perigu ba nasaun, kontra bandu no la tuir lei, autoridade bele halo intervensaun, ” nia subliña.

Reportajen ekipa Rafa.tl