PNTL ho F-FDTL Halo Avaliasaun Estratéjika no Operasionál

PNTL ho F-FDTL halo enkontru avaliasaun estratéjika no operasionál iha Kuartel Jenerál F-FDTL, Dili, Sesta (03/10/2025). Imajen/Rafa.tl

DILI, RAFA.tl– Polísia Nasionál Timor-Leste (PNTL) ho FALINTIL-Forsa Defeza Timor-Leste (F-FDTL), Sesta (03/10/2025),  halo enkontru  avaliasaun estratéjika no operasionál ne’ebé garante liberdade asaun husi órgaun soberanu sira, no avalia situasaun seguransa no estabilidade iha teritóriu nasionál.

Ministru Interiór (MI), Francisco da Costa Guterres hamutuk ho Ministru Defesa (MD), Donânciano Costa Pedro Klamar Fuik,  ho  Xefe Estadu Maiór Jenerál F-FDTL, Tenente Jenerál Domingos Raul Falur Rate Laek, no Komandante Jerál PNTL, Komisáriu Jerál, Henrique da Costa, hamutuk ho Vise-Xefe Estadu Maiór no ofisiál superiór sira PNTL nian hala’o sorumutuk avaliasaun estratéjika no operasionál ne’e iha Kuartel Jenerál F-FDTL, Fatuhada, Dili.

Ministru Interiór (MI), Francisco da Costa Guterres, ba jornalista sira hateten, ekontru avaliasaun servisu seguransa ne’e, hodi ko’alia kona-bá preparasaun konjunta husi F-FDTL ho PNTL, atu asegura ba eventu nasionál sira, inklui Timor-Leste nia adezaun ba ASEAN, no liu-liu iha loron ofisiál proklamasaun independénsia ba dala-50 ho selebrasaun Natal  2025 no tinan foun, 01 Janeiru 2026.

“Forsa rua ne’e atu  define sira-nia forsa tarefa atu hamosu tarefa ida servisu hamutuk,  hodi nune’e, bele asegura pás no estabilidade iha ita-nia rai, ida-ne’e mak la’o hela to’o festa ne’ebé ita sei iha loron 12 Novembru,  loron 28 Novembru, Natal no tinan foun 2026, ne’ebé mai atu koordena servisu ne’e oinsá atu bele hala’o servisu ho di’ak asegura eventu sira ne’ebé mak atu mai,” Ministru Francisco da Costa Guterres hateten.

Governante ne’e hatutan, parte seguransa PNTL no militár F-FDTL prontu iha kualker situasaun atu responde ho kualker forma hasoru situasaun saida de’it, ne’ebé kria instabilidade  no perturba orden públiku.

Iha sorumutuk ne’e, Xefe Estadu Maiór F-FDTL no PNTL esplika ona preparasaun forsa rua  ne’e  hodi servisu hamutuk, nune’e, bele asegura pás no garante estabilidade.

Reportajen ekipa Rafa.tl