PNTL ho F-FDTL Fó Seguransa Másimu Durante Selebrasaun Natal no Tinan Foun 2026

Operasaun PNTL hodi obriga loja nain sira reativa pesoál parazen iha aredór loja sira atu evita engrafamentu iha kapaital Díli. Imajen/Rafa.tl

DILI, RAFA.tl – Ministru Interiór (MI), Francisco da Costa Guterres, hatete, Governu iha ona despaixu ba Komandu Jerál Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) atu fó seguransa másimu ba sarani sira durante selebrasaun  Natal 2025 no tinan foun 2026.

Ministru Interiór, Francisco da Costa Guterres ba jornalista sira iha sentru Formasaun Polísia Akademia Comoro, Díli, Tersa (23/12/2025) hatete, iha Natal ne’e Governu liu husi rezolusaun ne’ebé iha, harí forsa tarefa katak F-FDTL liu-liu Polísia sira ne’e sei halo patrullamentu konjunta ajuda malu.

“Agora dau-dauk ita tama ona ba faze prevensaun, ita halo patrullamentu konjunta ida ne’e, meius ida hodi prevene, bainhira mosu problema ruma ita halo kedas atuasaun ho lalais hodi hamate konflitu para labele alastra  ba fatin  seluk  tan, ne’ebé Polísia kontinua  halo vijilante ne’e to’o loron 06 fulan-Janeiru 2026,” Ministru Interiór, Francisco da Costa Guterres hateten.

Ministru Interiór, Francisco da Costa Guterres husu komunidade hotu liu-liu ba joven sira atu kolabora ho forsa rua ne’e, atu bele selebra loron Natal ho  tinan foun 2026 ne’e ho di’ak.

“Lakohi ema ida atu sai vítima no lakon vida iha selebrasaun loron boot ida ne’e. Hakarak ema hotu hodi selebra ho kontente hamutuk ho família. Labele tan de’it problema ki’ik ida hodi afeta ema ida rua nia vida,” Nia subliña.

Governante ne’e alerta ba ema hotu atu labele konsumu alkohol iha  dalan, hakarak konsumu tua hodi selebra hamutuk ho família tenke iha uma, nune’e hodi minimiza problema ka asidente durante selebrasaun Natal ho tinan foun.

MI  Promete Mellora Servisu PNTL iha 2026

Ministériu Interiór, Francisco da Costa Guterres promete sei mellora servisu Polísia Nasionál Timor-Leste (PNTL) nune’e bele profisionál liután iha tinan 2026.

“Avaliasaun ohin  ho PNTL ne’e para atu entende didi’ak instituisaun PNTL ninia kapasidade, saida mak presiza aumenta, saida mak di’ak ita kontinua, saida mak ladi’ak ita hadi’a, rekursu umanu ga, ekipamentu ga   kapasidade operasionál ga atetude ema nian ga disiplina ita tenke haré hotu kedas, atu nune’e dehan katak 2026 ne’e ita komesa mellora hotu, nune’e sira nia servisu iha terenu ne’e di’ak, atu bele ajuda nasaun, estadu ida ne’e atu ajuda Governu atu hametin páz no estabilidade ita nia komunidade, ita nia populasaun bele moris hakmatek atu bele hala’o sira nia  vida lor-loron nian,” Francisco da Costa Guterres tenik.

Governante ne’e afirma, nia planu iha  tinan oin, kontinua foku ba  hadi’a kapasidade operasionál instituisaun ne’ebé mak iha Ministériu nia okos hanesan Migrasaun ho sira  prevensaun konflitu inklui Autoridade Protesaun Sivíl.

Reportajen ekipa Rafa.tl