PNTL Halo Identifikasaun Ba Ema Na’in-rua Ne’ebé Deskonfia Fasilita Sidadaun Indonésia Hetan Pensaun Veteranu

Autoridade Polísia akompañia sidadaun Indonésia ho inisiál FN ne'ebé hetan pensaun veteranu. Imajen/PNTL

DILI, RAFA.tl– Polísia Nasionál Timor-Leste (PNTL) liu husi Diresaun Servisu Informasaun Kriminál (DSIK) halo identifikasaun ba sidadaun na’in-rua ho inisiál AC no RS ne’ebé deskonfia fasilita sidadaun Indonésia ida ho inisiál FN hetan pensaun veteranu.

Porta-voz Komandu Jerál PNTL, Superintendente Polísia João Belo dos Reis hatete, Polísia Diresaun Servisu Informasaun Kriminál ezekuta ordem hodi halo kedas kordenasaun ho autoridade Servisu Migrasaun iha Fronteira Mota-ain no Batugade hodi kaptura sidadaun Indonésia ho inisiál FN tanba deskonfia simu osan pensaun veteranu.

Nia afirma, bainhira DSIK rekolla informasaun husi sidadan Indonésia ne’e, hodi kolabora ho parte Notariadu no mós Konsellu Veteranu buka tuir sidadaun sira ne’ebé durante ne’e fasilita dokumentu veteranu ba sidadaun  estranjeira ne’e no sidadaun estranjeira ne’e konfesa sai faktus, ho nune’e, parte PNTL halo kedas identifikasaun ba sidadaun nasionál na’in-rua.

“Balun bolu da-dauk, balun seluk ami hein delegasaun kompeténsia tuir mai sei bolu tan, ne’e falsifikasaun, la valoriza mós ita nia luta na’in sira ne’ebé tuir lolós hetan. Ida-ne’e ami konsidera grave, tenke hetan atensaun sériu husi Estadu, liu-liu ba parte sira ne’ebé prodús dokumentu sira. Deskonfia iha tan ho atuasaun ne’ebé ami halo ba sidadaun inan-feton refere, iha informasaun naban-naban mai, ne’ebé ami sei atua karik iha prova konkretu.  Ema na’in hira ami seidauk bele publika, maluk sira iha ona provas balun. Ami halo kordenasaun ho Notariadu no mós Ministériu Asuntu Kombatente no Libertasaun Nasionál ho Konsellu Veteranu nian hodi bele prodús tan informasaun konkretu balun. Sidadaun inisiál AC ne’e sira ne’ebé iha laran no RS ne’e sidadaun estranjeira FN nia oan,” Superintendente Polísia João Belo dos Reis informa ba jornalista sira iha Kuartél Jerál PNTL, Díli, Segunda (5/01/2026).

Superintendente Polísia ne’e hatutan, Diresaun Servisu Informasaun Kriminál asegura ona sidadaun Indonésia inisiál FN nia dokumentu, ne’ebé kazu ne’e aprezenta ona ba Ministériu Públiku.

“Prosesu identifikasaun, hatudu nia iha Billete Identidade (BI), kartaun Eleitorál no mós sertidaun RDTL, agora ita asegura nia dokumentu sira, ne’ebé ita autoriza nia hela ho família iha Díli laran, nia prosesu la’o hela. Ne’ebé kazu ne’e aprezenta ona ba Ministériu Públiku,” Nia hateten.

Autoridade Seguransa hetan dadus sira ne’ebé deskonfia sidadaun estranjeira falsifika dokumentu sira ne’ebé iha, no hatudu poténsia ne’ebé mosu iha parte Ministériu nian katak involve forte iha faktus ema balun husi Timor-Leste fasilita ema estranjeiru ne’e hetan veteranus, mesmu  Lei ne’e rasik bandu sidadaun estranjeiru atu simu pensaun veteranu ne’ebé governu hasai.

Polísia Diresaun Servisu Informasaun Kriminál servisu hamutuk ho autoridade Migrasaun kaptura sidadan Indonésia ho inisiál FN, iha fronteira Batugade,  Kuarta (31/12/2025), bainhira sidadaun Indonésia ne’e utiliza Pasaporte Indonésia atu fila ba nia hela fatin iha provínsia Nusa Tenggara Timur (NTT).

Reportajen ekipa Rafa.tl