PNTL F.C Kampiaun Tasa Rotativa Avó Nana 2026

PNTL F.C sai kampiaun tasa rotativa Avó Nana 2026.

Díli, 28 Setembru 2026 (RAFA)–PNTL F.C mantein titúlu kampiaun Tasa Rotativa Avó Nana 2026 hafoin vense Bairu da Paz (BDP) ho score 4-1 iha sutu penalidade, depois  empate 1-1 durante  jogu minutu 90.

Jogu finál hala’o iha Estádiu Munisipál Díli, Domingu-ne’e, BDP loke uluk rezultadu iha minutu 17 liu husi Ilariu Ximenes. Maibé, PNTL iguala iha minutu 34 liu husi Alexandre, hodi empata 1-1 to’o primeira parte remata.

Iha segunda parte, ekipa rua kontinua halo presaun, maibé laiha golu tan to’o minutu 90.

Iha sutu penalidade, PNTL marka golu haat, enkuantu BDP marka deit golu ida, hodi PNTL sai kampiaun.

Treinador BDP, Verissimo Ximenes, hateten falta esperiénsia no presaun  sai fator ba ekipa.

“Ekipa ne’e hanesan ekipa foun, ne’ebe primeira vez  tama iha final. Iha jogu ne’e ami hasoru ekipa PNTL ne’ebe mak zigante. Ami derota ho rezultadu penalidade tanba lakon esperiensia, no ho presaun mak halo. Maibe, em-jeral ha’u nia ekipa jogador mesak di’ak, ami domina jogu, husi primeira no sigundu parte,” Verissimo Ximenes hateten.

Treinador PNTL F.C, Eduardo Pereira, orgullu ba nia ekipa no agradese esforsu no disiplinu jogador sira durante preparasaun.

“Ha’u  orgullu ba Tasa Avó Nana, lafasil atu defende Tasa ne’e, maibé esforsu husi jogador sira, bainhira ami treinu  jogadór sira disiplina  no treinu ho di’ak, rezultadu mak hanesan ne’e,” Eduardo Pereira hateten.

Ho Kampiaun ne’e, PNTL hetan medalla no osan  ho montante US$15,000.00, BDP nu’udar segundu lugar simu US$8,000.00, Laisorulai F.C iha terseiru lugar simu US$5,000.00, no Zhavia F.C iha kuartu lugar simu US$2,500.00.

Premiu individual aira, hanesan top score, mellor jogador, mellor guarda-rede no mellor treinador, rekolla hotu husi ekipa PNTL F.C. ho premiu motór.

Jornalista: Marito da Costa/Fidelino de Araújo