PNTL Detéin Suspeitu SG Ne’ebé Oho Nia Aman iha Karau-Balu

Polísia kaptura suspeitu ne'ebé oho nia aman iha Suku Karau Balu, Postu-Administrativu Viqueque Vila, Munisípiu Viqueque. Imajen/dok.PNTL

DILI, RAFA.tl – Polísia Nasionál Timor-Leste (PNTL) liu husi Diresaun Servisu Investigasaun Kriminál (DSIK) hamutuk ho ekipa sekreta ezekuta mandadu Tribunál nian hodi detéin sidadaun mane ida ho inisiál SG iha área Bairu-Pité tanba  deskonfia oho nia aman iha Suku Karau-Balu, Postu-Administrativu  Viqueque Vila, Munisípiu Viqueque, iha loron 08 fulan-Dezembru 2025.

Porta-vóz Komandu Jerál PNTL Superintendente Polísia João Belo dos Reis, ba jornalista sira iha Ministériu Interiór, Kinta (18/12/2025) hatete, ekipa konjunta ezekuta mandadu Tribunál ne’e iha Kinta madrugada hodi kaptura suspeitu iha área Bairu-Pité iha família balun nia rezidénsia.

“Kazu omesídu akontese iha parte Viqueque depois ami hetan mandadu Tribunál detekta katak suspeitu halo movimentu ba parte seluk, nune’e Komandu Polísia Munisípiu Viqueque halo servisu ho Komandu Jerál PNTL no servisu intelijénsia sira hodi identifika, horseik, suspeitu kaptura iha parte Díli no lori ona ba Komandu Polísia Baucau hodi submete ba iha Tribunál,” Porta-vóz PNTL Superintendente Polísia João Belo dos Reis informa.

Superintendente Polísia ne’e haktuir, bainhira mosu kazu omesídu ne’ebé halo sidadaun ne’e lakon vida, Polísia liu husi Komandu PNTL Munisípiu Viqueque tun direta ba iha fatin akontesimentu krime hodi evakua mate-isin ba iha Ospitál Nasionál Guido Valadares hodi halo autópsia.

“Prosesu autópsia iha ona rezultadu, nune’e mate-isin entrega ona ba família hodi halo prosesu fúnebre,” Nia informa.

Suspeitu SG Komandu PNTL Munisípiu Baucau halo ona detensaun hodi kumpri oras 72, molok aprezenta ba Tribunál Judisiáriu Primeira Instánsia  Baucau hodi halo julgamentu  primeiru interogatóriu.

Reportajen ekipa Rafa.tl