PNTL Detéin Sidadaun Indonézia Na’in-Lima Lori Osan US$111,000.00 ho Sasán Ilegál Tama Timor-Leste

Osan ho montante US$111,000.00 ne'ebé autoridae Polísia prende husi suspeitu sira hatama sasán ilegál. Imajen/Rafa.tl

DILI, RAFA.tl– Polísia Nasionál Timor-Leste (PNTL) detéin sidadaun Indonézia na’in-lima ne’ebé lori osan ho montante US$111,000.00, no sasán ilegál hanesan gazoel ho gazolina ne’ebé la iha deklarasaun tama teritóriu nasionál Timor-Leste.

Notísia Relevante: PNTL Identifika Involku ho Projetil Bidón Tolu Tama husi Portu Tibar

Portavós interinu PNTL, Superintendente Asistente Polísia Mozinho Correia hatete,  Kuarta (22/10/2025), PNTL ho ekipa konjunta kompostu husi Diresaun Servisu Investigasaun Kriminál, Alfándega, Polísia Sientífika Investigasaun Kriminál, Servisu Nasionál Intelijénsia, servisu Informasaun Militar F-FDTL, halo aprensaun no intervensaun ba karreta kamioneta lima husi Atambua, iha Postu-Administrativu Liquiça Vila, Munisípiu Liquiça tanba  lori osan  ho montante US$111,000.00 no  sasán ilegál hanesan gazoel ho gazolina ne’ebé laiha deklarasaun.

“Karreta sira ne’e mai mamuk objetivu atu tula produtu lokál iha Dili laran, maibé iha tempu ne’ebé hanesan sira mós hatama mina ilegál gazoel no gazolina, sira subar iha karreta laran no hatama mai Timor-Leste. Aleinde mina, sira mós lori osan ho montante boot US$111,000.00 ne’ebé loloos ne’e hetan deklarasaun husi autoridade Indonézia ho Timor-Leste nian, maibé realidade la iha,” Superintendente Asistente Polísia Mozinho Correia, ba jornalista sira iha Ministériu Interior, Díli, Kinta (23/10/2025).

Kazu ne’e PNTL halo ona detensaun ba sidadaun Indonézia na’in-lima ho evidénsia karreta lima,  mina ho osan sira ne’e iha kuartel jerál PNTL iha Diresaun Investigasaun Kriminál Nasionál.

Nia afirma prosesu ne’e bolu dehan identifikasaun detensaun flagante delitu no fora flagrante delitu. Entaun depende situasaun ne’e prenxe ida ne’ebé, se situasaun ne’e la prenxe flagrante delitu ka fora flagrante delitu entaun aplika identifikasaun katak rekolla ninia informasaun hotu-hotu, lokaliza nia para nune’e Tribunál liu husi Ministériu Públiku (MP), halo asaun hasai mandadu detensaun.

“Prosesu la’o, hela semana oin ha’u halo detallu liu tan, dadaun ema na’in-lima halo detensaun, ema ne’ebé na’in ba osan ita halo identifikasaun tanba la prenxe rekezitu  flagarante delitu nian.” Tenik nia.

Dadaun ne’e Ministériu Públiku notifika ona sidadaun Indonézia nian na’in-lima ho naran inisiál PJDS, IF, MS, YOL, no OSH,  ho númeru úniku krimi (NUK) 0343/25.PNSIC.

Karreta lima ne’ebe  uza hodi tula  osan, mina gazoel ho gazolina jerigen 9 ho total lítru 1.855 ne’e,  karreta sira-nia númeru matríkula DH 8400TC, DH 8007TC, DH 8462EA, DH 8572EF, DH 8952EH.

Reportajen ekipa Rafa.tl