PNTL Buska no Apreensaun Ba Lotaria Grand Dragon Hodi Detein Mós Jerente Na’in-tolu

PNTL halo buska no apreensaun iha Lotaria Grand Dragon, Dili, Kuarta (03/12/2025). Imajen/Rafa.tl

DILI, RAFA.tl– Polísia Nasionál Timor-Leste (PNTL), liuhosi Diresaun Servisu Investigasaun Kriminál (DSIK), Kuarta (03/12/2025), hale’u tuku 16:10 Otl, ezekuta mandadu husi Ministériu Públiku(MP) halo buska no apreensaun ba jogu Lotaria Grand Dragon ne’ebé lokaliza iha Praia dos Coqueiros, no mós nia sukursál iha Timor Plaza.

Iha prosesu buska no apreensaun ne’e, PNTL  lidera husi Komandante Operasaun Superintendente Asistente Polísia Mouzinho Tavares Correia, asegura prova ka evidénsia sira, hanesan telemovel 15, kumputadór 10-resin, pasaporte,  kupon ho osan kuaze millaun ida dollar Amérikanu iha brankas, inklui halo identifikasaun ba traballadór balun no detensaun ba jerente na’in-tolu.

Ezekusaun ba buska ne’e hetan mandatu husi Ministériu Públiku liuhosi Prokuradór  João Marques, ho númeru Uniku Kriminal (NUC, sigla portugés) 0389/2025.PNSIC.

Ekipa DSIK mós husu permisaun ba jerente sira Lotaria Grand Dragon atu fó orientasaun no hapara atividade traballadór sira nian hodi entrega telemóvel ba ekipa DSIK hodi nune’e bele halo identifikasaun.

“Ami husi Polísia DSIK hetan mandadu Ministériu Públiku, ne’ebe agora  provezoriamente hapara aktividade Lotaria Grand Drago hodi ami halo servisu, “ Superintendente Asistente Polísia Mouzinho Tavares Correia hateten, Kuarta (03/12/2025).

Hafoin halo buska iha Pantai Kelapa, ekipa DSIK kontinua kedas ba buska no apreensaun iha  Lotaria Grand Dragon sukursal iha Timor Plaza.

Jerente  jogu Lotaria Grand Dragon ho inisial MFMP lamenta tebes ho buska ne’ebé autoridade seguransa halo tanba konsidera laiha karta notifikasaun antes.

“Ha’u esplika ba sira katak agora dadauk ha’u nia atividade la’o hela la iha indisiu krime ruma, depois ha’u nia sasán sira foti hotu, agora ha’u atu halo servisu oinsá. Ha’u atu fó de’it avizu ba kliente sira mós labele  tanba la iha autorizasaun, sira dehan so foti tiha ita boot nia deklarasaun mak ko’alia,”  jerente Lotaria Grand Dragon ne’e lamenta.

Nia haktuir mandadu la iha buat ida la iha mai de’it, agora jogu ida Lotaria ne’e jogu Timoroan de’it mak joga tanba rejistu ho númeru operador telefone +670 de’it.

“Hanesan jerente jogu lamenta liu Estadu haruka ita moderniza jogu dijitál  no ita selu impostu besik tinan tolu atu ba tinan haat, maka sala fali ne’e,” Jerente ne’e hateten.

Hafoin buska ekipa DSIK transporta kedas traballadór sira no jerente na’in-tolu ne’e ba iha edifísiu DSIK Komandu Jerál PNTL Caicoli hodi halo identifikasaun ba traballadór sira no halo kedas detensaun ba jerente na’in-tolu ne’ebé kompostu husi sidadaun Timoroan ida ho inisiál MFMP, no sidadaun estranjeiru na’in-rua iha  sela Komandu Munisípiu Dili durante oras 72 molok aprezenta ba Tribunál hodi halo prosesu primeiru interogatóriu.

Reportajen ekipa Rafa.tl