PM Xanana Selebra Eid Al-Fitr ho Musulmanu Sira no Haklaken Paz

PM Xanana hato'o Minal 'Aidin wal-Faizin ba musulmanu sira iha ámbitu selebrasaun Idul Fitri iha Embaixada Indonésia nian iha Díli, Sesta (20/03/2026). Imajen/Rafa.tl

DÍLI, RAFA.tl– Primeiru-Ministru (PM), Kay Rala Xanana Gusmão, akompaña husi Vise-Primeiru Ministru, Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, Sesta (20/03/2026), selebra Eid Al-Fitr ka Indul Fitri 1 Shawwal 1447 Hijriah hamutuk ho komunidade musulmanu sira iha Embaixada Repúblika Indonézia iha Díli.

Xanana Gusmão lori  governu no povu Timor-Leste nia naran  hato’o dezeju ksolok ba komunidade musulmanu ne’ebé selebra loron vitória iha luturjia Musulmanu nian.

“Idul Fitri, ita hotu husu ba leten aas ba (Maromak-red) hodi tulun nafatin ita, hako’ak malu ho domin, hodi nune’e, dame bele horik iha Timor nu’udar kondisaun di’ak tebes atu  ita dezenvolve ita-nia rai,’’ Xanana Gusmão hateten.

Xefe Governu husu  ba komunidade musulmanu iha Timor-Leste kontinua hamutuk ho hanoin ida, hodi lori Timor-Leste sai nasaun ida ne’ebé prosperu liu.

Iha fatin hanesan Embaixadór Indonésia mai Timor-Leste, Okto Dorinus Manik lori Repúblika Indonésia nia naran hato’o mós ksolok loron Idul Fitri ka Eid Al-Fitr ba komunidade sira iha mundu tomak ne’ebé selebra sira nia loron.

Nia afirma Idul Fitri maka maka marka finál Ramadan nian no nu’udar loron vitória nian ne’ebé lori ema fila fali ba pureza.

Ho selebrasaun loron Idul Fitri ida-ne’e Ebaixadór Okto Dorinus Manik  husu nafatin komunidade musulmanu nafatin iha hanoin ida, fó liman ba malu, firme nafatin hodi enfrenta situasaun ida ne’ebé agora akontese dadaun iha mundu.

Iha selebrasaun ne’e mos Primeiru-Ministru Kay Rala Xanana Gusmão hato’o agradesimentu ba Embaixadór Okto Dorinus Manik ne’ebé maka durante ne’e hala’o kna’ar iha Timor-Leste to’o  ohin loron atu termina nia mandate.

Embaixadór Okto Dorinus Manik hato’o obrigadu ba governu no povo Timor tanba durante nia mandatu iha Timor, nia rekoñese katak, Timor-Leste nasaun ida ne’ebé halo nia moris haksolok.

Molok ne’e, komunidade musulmanu sira halibur malu iha Meskita An-Nur hodi reza Eid (sholat id) hamutuk hodi selebra loron vitória.

Prezidenti Konselu Kurador Fundasaun An-Nur, Dili, Timor-Leste, Abdula Bim Siad Sagran, hatete komunidade musulmanu iha Timor-Leste selebra loron Idul Fitri 1 Shawwal, 1447 Hijriah.

“Ohin loron, hanesan ita hotu hatene loron bo’ot Idul Fitri ne’e mak komunidade musulmanu sira selebra depois sira halo jejun durante fulan ida,” Abdula Bim Siad Sagran esplika.

Nia hatutan, jejun ne’e ninia objetivu atu ita hamos ita-nia klamar no moris iha konsénsia atu halo di’ak ba malu no halo di’ak iha moris sosiedade.

Abdula Bim Siad Sagran hateten katak Idul Fitri la’ós deit selebrasaun vitória espirituál, maibé mós tempu atu reforsa valor solidariedade, toleránsia no perdua malu.

“Ha’u nai mensajen spesialmente ba komunidade musulmanu iha Timor-Leste atu mantein fé  hafoin jejun Ramadan hanesan modalidade ida ita bele halo kontintribuisaun di’ak  liubá ita nia família ho ita-nia nasaun Timor Leste,” nia hateten.

Tuir dadus husi Sensus 2022 hatudu katak relijaun ne’ebe ejiste iha Timor Leste hanesan musulmanu ho porsentu 3, Katóliku pursentu 97,6, Kristaun Protestante Evangelika porsentu 2,0 no Hindu pursentu ida (1%).

Reportajen ekipa Rafa.tl