PM Xanana Lamenta Tribunál Hasai Mandadu Buska, Apreensaun no Detensaun Ba Reitór UNTL ho Nia Dirijente Sira

Polísia kumpre mandadu Tribunál hodi halo buska, apreensaun no detensaun ba reitór UNTL, vise-reitór ho dirijente na'in-haat seluk tan, foin lalais ne'e. Imajen/Espesiál

DILI, RAFA.tl – Primeiru-Ministru (PM), Kay Rala Xanana Gusmão,  lamenta ho desizaun Tribunál hodi hasai mandadu buska, apreensaun no detensaun ba Reitór Universidade Nasionál Timor Lorosa’e (UNTL) inisiál JM ho Vise-Reitór no dirijente UNTL na’in-haat seluk tan.

Notísia relevante: Polísia Detein Reitór UNTL ho Nia Dirijente Na’in-Lima

Primeiru-Ministru (PM), Kay Rala Xanana Gusmão, espresa nia  lamentasaun ne’e ba jornalista sira  hafoin r enkontru semanál ho Prezidente Repúblika (PR), José Ramos-Horta iha Palásiu Prezidensiál, Díli, Kinta (15/01/2026).

PM Xanana informa mós katak iha enkontru Konsellu Ministru nian haré kona-bá akontesimentu iha loron 13 fulan-Janeiru 2026 ne’ebé Polisía Nasionál Timor-Leste (PNTL) liu husi Diresaun Servisu Investigasaun Kriminál Nasionál (DSIKN) ezekuta mandadu Tribunál Judisiál Primeira Instánsia Díli (TJPID) hodi halo buska, apreensaun no detensaun ba Reitór Universidade Nasionál Timor-Lorosa’e (UNTL), Vise Reitór ba Asuntu Administrasaun Finansa no Administradór Jerál inklui kargu xefia na’in-haat iha UNTL.

Xefe Governu la simu tanba justisa halo buat sira ne’e laiha liu konsiderasaun tanba kazu mosu iha UNTL ne’e mosu iha tinan rua kotuk ba ona iha Tribunál mais derepente mosu mandadu ida bolu Polisía  Nasional Timor-Leste (PNTL) ba kaer dosente sira no reitór foin fila husi Kupaun tau kedas aljema.

‘‘Ne’e mandadu ida, entaun entrega ba ema la’ós ba kaer fali hodi tau aljema, ita atu bulak tiha de’it ne’e, horseik, ami iha Konsellu Ministru lamenta tebe-tebes asoens sira ne’ebé lahún-ladikin sira ne’e. Ho buat sira ne’e, bainhira temi reforma justisa ne’e tenke iha duni, tanba la’ós ita doutór tiha ona be ita matenek ona, laiha ida,’’ Xanana Gusmão afirma ho hirus.

Primeiru-Ministru  konta tuir no halo ezemplu ba kazu Manuel Gusmão, sidadaun ida nia iha uma ida iha Díli laran ema balun hadau, nia ba aprezenta iha Tribunál nia manán tiha, ne’e komunidade tomak hatene tanba nia hela iha fatin ne’e, maibé derepente de’it Tribunál hasai desizaun ida hodi fó fali ba ema seluk.

“Ida-ne’e ita-nia sistema justisa la’o kapás tebes, ita-nia juís no juisa matenek tebes. Tanba ne’e haré didi’ak justisa nia kbi’it atu halo investigasaun, atu haré didi’ak faktus sira ne’e laiha ida liu, dalaruma keta simu buat ruma karik, hanesan ha’u fumadór,  keta “uang rokok karik“,” Xanana hateten.

Situasaun sira ne’e mós Primeiru-Ministru  informa ba Prezidente Repúblika atu haré sistema justisa ne’e, atu reforma justisa aban-kedas ne’e susar, maibé kurtu prazu  kala sei aguenta ba buat sira ne’e hotu, médiu prazu kala bele, tanba foin dau-dauk ema hotu rona haruka ema 50 ba estuda iha Portugal atu tuir sira nia kbi’it, aprende ne’e pois sai tiha estájiu tinan rua iha ne’ebá hodi bele hatene.

Reportajen ekipa Rafa.tl