PM Xanana Informa Ba Xefe Estadu Kona-bá Alterasaun Lei Dívidas Públikas

PM Xanana kaer-liman ho PR Ramos-Horta hafoin enkontru semanál iha Palásiu Prezidensiál, Kinta (29/01/2026). Imajen/Rafa.tl

DILI, RAFA.tl –Liu husi sorumutu semanál ho Prezidente Repúblika José Ramos-Horta iha Palásiu Prezidensiál, Kinta (29/01/2026), Primeiru-Ministru Kay Rala Xanana Gusmão,  informa kona-bá alterasaun lei dívidas públikas ne’ebé IX-Governu Konstitusionál halo.

“Ha’u informa ba Prezidente Repúblika  katak, Tersa (27/01/2026), ami aprova lei alterasaun ba dívidas públikas la barak, mais iha korresaun oituan iha ne’ebá, tanba kona-bá ita nia empréstimu ne’ebé ita halo ho rai seluk, ita halo emprestimu ne’e iha kedas IV-Governu, hanoin katak di’ak liu ita empréstimu, duke ita hasai diretamente husi fundu petróleu, tanba ho empréstimu ita temi karik, hasai nei-neik,” Primeiru-Ministru Kay Rala Xanana Gusmão, informa ba jornalista sira hafoin ekontru ho Xefe Estadu.

Primeiru-Ministru Kay Rala Xanana Gusmão hatutan, iha IV-Governu mós halo investimentu fundu petróleu nian no investimentu ne’ebé Governu investe no simu lukru ne’e, liu Billaun sia. Ho nune’e, liu husi empréstimu, nasaun bele selu neineik, maibé jurus ne’ebé maka ki’ik, atu nune’e fundu petróleu iha montante di’ak nafatin, hodi nune’e Timor-Leste bele investe nafatin.

Timor-Leste nia Bayu Undang hotu ona, fundu petrolíferu mós menus, tanba ne’e ho esperansa katak Greater Sunrise bele mai kompleta fila-fali saida maka nasaun ne’e nia presiza .

“Agora ita hotu-hotu hatene katak Bayu Undang hotu tiha ona, fundu petróleu mós la sa’e ona maibé menus, iha investimentu ne’ebé ohin temi mós, investe menus tan ona, ne’ebé ita hein katak Greater Sunrise bele mai taka tiha buat ne’ebé ita presiza ne’e,” Xefe Governu  ne’e subliña.

Timor-Leste iha sistema ida ne’ebé maka di’ak tebes hahú husi tinan 2026, nasaun ida-ne’e sai nasaun dahuluk iha ASIA tomak no ba dahaat iha mundu ne’ebé kumpri sistema katak dólar ida, tenke tau iha nia fatin.

Timor-Leste mós garante transparánsia no la eziste korrupsaun, maske iha lukru balu ne’ebé la fila ba kofre Estadu, ida-ne’e tanba haré ba programa mandatu Governu idak-idak nia.

Xanana Gusmão ho esperansa katak, iha tinan 2026 ida-ne’e sei di’ak liután, gasta halo di’ak, tanba osan povu nian, no Timor-Leste mós besik ona atu aprova planu kona-bá ekonomia azul ne’ebé sei hahú iha Autoridade Administrativa  Ataúro.

Atu fó hanoin mós katak, IX-Governu Konstitusionál liu husi Reuniaun Konsellu Ministru, Tersa (27/01/2026), aprova mós Proposta Lei rua, ne’ebé aprezenta husi Ministra Finansas, Santina José Rodrigues F. Viegas Cardoso, ho objetivu atu halo alterasaun dahuluk ba Lei nú. 13/2011, loron 28 fulan-Setembru, ne’ebé estabelese Rejime Dívida Públika no atu kria Rejime Jerál ba Taxas Administrativas.

Iha komunikadu ofisiál ne’ebé Rafa.tl asesa husi Gabinete Mídia Primeiru-Ministru Kay Rala Xanana Gusmão, haktuir relasiona ho proposta Lei ne’ebé halo alterasaun dahuluk ba Lei nú. 13/2011, loron 28 fulan-Setembru, Rejime Dívida Públika, diploma ne’e ho objetivu atu adapta enkuadramentu legál dívida públika nian ba nesesidade, atu diversifika fontes finansiamentu ba Orsamentu Jerál Estadu nian hodi hamenus dependénsia maka’as ba Fundu Petrolíferu.

Reportajen ekipa Rafa.tl