PM Xanana Husu Vise-Ministra Finansas Regina de Jesus Servisu ho Responsabilidade

PM Xanana Gusmão ho Vise-Ministra Finansas foun, Regina de Jesus de Sousa. Imajen/Rafa.tl

DILI, RAFA.tl– Primeiru-Ministru (PM), Kay Rala Xanana Gusmão, husu Vise-Ministra Finansas foun, Regina de Jesus de Sousa, servisu ho responsabilidade hodi mellora liután sistema finanseiru iha Timor-Leste ba futuru.

Vise-Ministra Finansas, Regina de Jesus de Sousa, simu posse husi Prezidente Repúblika José Ramos-Horta,  Kinta (12/02/2026), iha Palásiu Prezidensiál, tuir Dekretu Prezidente Repúblika Nú. 17/2026, hodi kompleta kompozisaun estrutura IX Governu Konstitusionál hafoin Eis-Vise-Ministra Finansas Felícia Claudinanda Cruz Carvalho rejigna aan husi nia kargu.

Primeiru-Ministru, Kay Rala Xanana Gusmão, ba jornalista sira hafoin partisipa serimónia tomada de pose ba Vise-Ministra Finansas foun ne’e hatete,  lori fulan ida tenta ko’alia ho Felícia Carvalho, nia dehan  sente  labele ne’e mak husu demisaun, ne’ebé fiar katak Vise-Ministra Finansas foun, Regina de Jesus de Sousa, sei servisu ho di’ak tuir kompeténsia ne’ebé iha.

“Vise-Ministra Finansas foun, ha’u koñese, Ministra Finansas, ha’u koñese. Vise-MInistra Finansas foun ne’e  ne’e, ha’u koñese uluk to’o ohin, antes mai toma posse, nia  Diretora Jerál Tezouru servisu  ho kompetente, responsável. Tanba ita mós iha prosesu hadi’a tiha sistema finanseiru ne’ebé Governu uluk kria hodi muda ita nia sistema uluk ne’e, mak feto na’in-rua ne’e sei kaer tiha sistema finanseiru iha Timor,” Primeiru-Ministru Kay Rala Xanana Gusmão hateten.

Xefe Governu husu ba Vise-Ministra Finansas atu servisu ho di’ak, koordena ba malu, fó servisu ba malu, nune’e Governu ida-ne’e  nia mandatu, sistema finanseiru tenke la’o di’ak.

“Nune’e mós fó atensaun ba maluk sira ne’ebé toma konta finansas iha munisípiu sira, tanba ita atu tama ba desentralizasaun. Ne’ebé parabéns bom traballu, ami iha konfiansa ho ita-boot. La fó parabéns ba Ministra, tanba ita boot kontinuasaun, bom traballu. Ha’u sei ezije ba imi na’in-rua, servisu ho fuan ho ulun no integridade,” Primeiru-Ministru afirma.

Vise-Ministra Finansas foun Regina de Jesus de Sousa, nu’udar espesialista finansas ho esperiénsia liu tinan 20 iha Ministériu Finansas. Nia lori koñesimentu tékniku nível aas iha Jestaun Finansas Públikas (PFM) ba nia pozisaun foun.

Eis-Diretora Jerál Tezouru nian,  Regina de Jesus de Sousa sai instrumentál hodi asegura integridade, efisiénsia, no transparénsia ba sistema finanseiru Estadu nian.

Ninia lideransa kobre área estratéjiku sira inklui kontabilidade nasionál, operasaun tezouru nian, ezekusaun orsamentál, no jestaun pagamentu, ne’ebé diretamente apóia polítika Governu no reforma Jestaun Finansas Públikas nian.

Koñesidu ho nia abilidade analítika no koñesimentu konformidade, nia iha istória forte ida kona-bá harí ekipa, promove kooperasaun entre ajénsia sira, no fó konsellu ba órgaun Estadu sira kona-bá asuntu orsamentál.

Nia esperiénsia aumenta ona liu hosi formasaun internasionál avansadu ho Fundu Monetáriu Internasionál (FMI) no Banku Dezenvolvimentu Aziátiku (ADB, sigla inglés), ne’ebé foka ba modernizasaun tezouru, sustentabilidade dívida, no polítika fiskál.

Reportajen ekipa Rafa.tl