PCIC Kaptura Suspeitu JMR Ne’ebé Bosok Ema Ba Servisu iha Austrália

PCIC Kaptura Suspeitu JMR Ne’ebé Bosok Ema Ba Servisu iha Austrália,

DILI, RAFA.tl- Polísia Sientífiku Investigasaun Kriminál (PCIC, sigla portugés) kaptura suspeitu ho inisiál JMR hodi halo identifikasaun tanba deskonfia prátika  atividade meius operandu burla hodi bosok ema ba servisu iha Austrália.

Porta-voz PCIC, Inspetór-Xefe Mário Tavares, ba  Jornalista  sira iha Edifísiu PCIC, Díli, Tersa (24/02/2026) hatete, bainhira PCIC hala’o servisu iha terenu  durante semana ida nia laran,  konsege halo identifikasaun  ba suspeitu JRM komesa  ninia modus operandu  liu-husi publikasaun iha Tiktok, konvense vítima sira atu bele entrega  osan balun ba nia atu  ba tratamentu  dokumentu  ba  vítima sira hodi fasilita  ba servisu iha Austrália.

“Servisu  informasaun Judisiál  PCIC nian, iha terenu halo atividade  hodi tuir suspeitu JMR ne’ebé maka alegadamente halo atividade burla, atu lori  vítima sira ba servisu iha Austrália,” Inspetór-Xefe  Mário Tavares informa.

Nia hatutan, suspeitu JMR  halo modus operandu diferente hodi atrai vítima  sira, suspeitu konfesa nia aan  hanesan  médiku ida iha Ospitál Nasionál Guido Valadares (HNGV, sigla portugés), maibé ekipa sira konsege halo konfirmasaun ho médiku ne’ebé maka  suspeitu utiliza nia naran. Médiku ne’e iha duni, maibé la’ós médiku ne’e maka halo modus operandu iha mídia sosiál.

Suspeitu JMR  ne’e konvense vítima sira,  hodi hatete katak, nia hanesan Polísia Militár,  ne’ebé maka halo rekrutamentu ba servisu iha Austrália,  maibé depois  Autoridade  Judisiál liu-husi servisu informasaun PCIC halo konfirmasaun suspeitu JMR  la’ós  membru husi Forsa Defeza nian.

Suspeitu JMR mós  utiliza modus operandu hodi bosok vítima sira katak nia oan husi Ministra Solidariedade Sosial no Inkluzaun, Verônica das Dores, nune’e nia fó garantia ba vítima sira hodi  trata dokumentu ba servisu iha Austrália.

“Suspeitu bosok vítima sira katak nia hanesan oan husi membru Governu  ida,  ne’ebé hala’o servisu  hanesan membru Governu nia oan, nia maka halo servisu  ba membru Governu refere, tanba hetan konfiansa husi  ita nia na’i ulun polítika sira, suspeitu ne’e garantia ba vítima sira katak  nia bele  haruka ona ba servisu iha Austrália,” nia informa.

Ekipa investigasaun  konfirma ona membru Governu refere katak la’ós nia oan maka Suspeitu JMR, maibé suspeitu maka utiliza meiu ida-ne’e hodi konvense vítima sira  atu halo tratamentu dokumentu ba servisu iha estranjeiru

Suspeitu  JMR, promete ba vítima sira atu viajen ba Austrália  iha  loron 15 Fevereiru 2026, maibé depois nia halo fali aliña seluk ida,  nia promete tan  ba vítima hodi adia ba  loron 19 Fevereiru 2026,  maka aranka ba  Austrália.

Vijilánsia PCIC ho kolaborasaun eskuadra Polísia  Dom Aleixo, asegura ka kaptura suspeitu JMR iha tuku 07:40 dadeer iha Suku Bairo-Pite, Postu Administrativu Dom Aleixo, Munisípiu Díli.

Suspeitu  aluga karreta Mazda Demio ho númeru matríkula A 28 487, ekipa informasaun husi PCIC rekolla,   konsege to’o duni  karreta nia na’in.

“Ne’ebé ha’u atu hatete de’it suspeitu ho inisiál JMR, agora dau-dauk iha prosesu identifikasaun,  tanba horikalan , ita foin foti  iha Bairro-Pité,” nia tenik.

Porta-voz Mário Tavares haktuir, PCIC foti suspeitu bazeia ba keixa husi komunidade no polísia halo tratamentu ho halo verifikasaun informasaun, buka tuir dadus ne’ebé iha, inklui rekolla informasaun kona-bá suspeitu  JMR konversa ho vítima sira.

Evidénsia ne’ebé iha agora mak identifika karreta ne’ebé Suspeitu JMR utiliza. Vítima sira mós aprezenta prova sira ne’ebé hatudu katak suspeitu promete buat balu ba sira, no sasin husi vítima rasik mak  hato’o keixa hasoru suspeitu refere.

Tuir prosedimentu prosesuál, PCIC sei hala’o prosesu identifikasaun, no prosesu ida-ne’e tenke kumpri antes oras rua (2), hodi garante legalidade no direitu hotu-hotu.

Nia subliña, vítima na’in-rua ho naran inisiál NS no IFX hetan prejuízu to’o US$11,000.00. Maski nune’e, PCIC fiar katak vítima seluk barak loos iha ona, no suspeitu ne’e la la’o mesak, maibé iha rede ida ne’ebé servisu hamutuk ho nia. Tanba ne’e, PCIC sei halo auto partisipasaun ba Ministériu Públiku hodi hala’o atuasaun ba inkéritu. Maske nune’e,  la taka dalan ba  PCIC nia servisu rekolla informasaun no prova seluk, hodi submete nafatin ba autoridade kompetente.

Bainhira prosesu inkéritu loke ona, investigasaun sei kontinua nafatin, tanba kestaun ida-ne’e envolve servisu rede ne’ebé utiliza mídia sira atu konvense komunidade liu-husi modus operandu Burla.

Reportajen ekipa Rafa.tl