Patrosinadór Taça da Liga Entrega Ona Prémiu Karreta Suzuki Alto Tolu no Motór Ida ba FFTL

Karreta tolu ho motór ida nu'udár prémiu ne'ebé sei oferese ba mellor jogadór, mellor markadór no mellor guarda rede, inklui mellor jogadór juvenil iha Finál Taça da Liga FFTL iha Estádiu Munisipál Díli, Sábadu (28/02/2026). Imajen/Rafa.tl

DILI, RAFA.tl – Patrosinadór Taça da Liga hanesan Metrolink, Salimagu no ASB NAGI Unipesoal, Lda entrega ona prémiu karreta Suzuki Alto tolu no motór ida ho marka Honda Beat ba Federasaun Futeból Timor-Leste (FFTL) hodi oferese ba mellor jogadór, mellor markadór no  mellor guarda rede, inklui mellor jogadór juvenil.

Notísia Relevante: Finál Taça Liga FFTL, Karketu Díli F.C Garante Mantein Títulu Kampiaun no Emmanuel F.C iha Ambisaun Halo Istória

Prezidente FFTL, Nilton Telmo Gusmão dos Santos, liu husi konferénsia ba imprensa, iha edifísiu FFTL, Díli, Kuarta-loraik (25/02/2026), agradese ba apóiu tomak husi patrosinadór sira no konsidera empreza Timor oan sira iha vontade no  jestu konkretu hakarak kontribui no dezenvolve futeból Timor-Leste sai orgullu nasionál.

“Ha’u lori Federasaun Futeból Timor-Leste nia naran, no mós jogadór klubu sira no adeptus futeból hotu, hakarak agradese ba empreza Metrolink ne’ebé mai ho nia na’in, José Januario dos Reis Costa no empreza Sali-Magu ne’ebé mai ho nia na’in, Sansão Gomes, no mós empreza Nagi ne’ebé mai ho na’in, Ambreo Belo. Hanesan ita hotu haré sira-nia apóiu ba futeból nu’udar jestu konkretu husi ita nia empreza Timor oan sira, ne’ebé hakarak haré dezenvolvimentu desportu iha ita nia rai, tanba ne’e mak ho sira nia vontade rasik hakarak kontribui iha ita nia atividade Federasaun nian, liu-liu iha Taça da Liga hodi kontribui karreta tolu, portantu prémeiu tolu ne’e empreza sira oferese ba mellor jogadór, mellor markadór, mellor guarda rede no mós mellor jogadór juvenil, tanba iha jogu Taça da Liga, obrigatoriamente klubu ida tenke hatama mós jogadór under seventing (SUB 17), tanba ne’e mak ita mós hakarak apresia ka fó prémiu ruma ba jogadór sub 17 ne’ebé partisipa iha jogu Taça da Liga durante ne’e, portantu prémiu haat ne’e, husi empreza sira, sei dedika ba individuál sira ne’ebé joga iha klubu sira,”  Nilton Telmo Gusmão dos Santos hateten.

CEO Metrolink, José Januario dos Reis Costa hatete, nia parte iha interese hakarak kontribui, tanba futeból  hanesan meius  koletivu,  inklui iha konfiansa ba Prezidente FFTL ne’ebé hatudu ona rezultadu signifikante durante mandatu.

“Futeból ne’e buat ida jogu koletivu, ida hatama golu, hotu-hotu kontente, kuandu ita sofre golu, la’ós de’it baliza mak sofre maibé amante, treinadores, klubu hotu, ne’e espíritu koletivu,  tanba ne’e mak ami hanoin iha interese atu fó kontribuisaun ki’ik oan, kontribuisaun ne’e refleta no espresa mós ami nia konfiansa ba lideransa FFTL, tanba kuandu Sr. Nilton eleitu, foin ikus ne’e eleitu por unanimidade, ne’e ita bele iha konfiansa liu husi nia traballu estraordináriu sira, que últimos anos ne’e, ita haré katak atinjimentu lubuk ida mak prienxe, tanba ne’e ami iha konfiansa ba lideransa FFTL,” José Januario dos Reis Costa afirma.

Iha fatin hanesan, CEO kampañia Sali-Magu, Sansão Gomes, hatete, ho vizaun lori Futeból sai orgullu nasionál ne’e, sai hanesan dalan ba emprezáriu Timoroan sira atu bele kontribui fó mos sira nia kontribuisaun hodi lori dezenvolvimentu ba futeból iha rai laran.

“Ho kontribuisaun ne’ebé ami mai kontribui ba federasaun, tanba ami haré katak ho lideransa atuál federasaun, mai ho prinsípiu ida katak, futeból ne’e hanesan orgullu nasionál no interese nasionál ne’ebé ema hotu iha interese ba, tanba ne’e mak ami haré ho vizaun lideransa atuál federasaun futeból Timor-Leste nian fanun ami hanesan empreza nasional Timor oan, halo ami mos iha hanoin ida katak, ho kontribuisaun ki’ik ne’ebé ami oferese, bele kontribui ona hodi dezenvolve futeból iha ita nia rai,” Sansão Gomes tenik.

CEO kompañia ASB NAGI  Unipesoal Lda, Abreo Belo hatete, prémiu ne’ebé oferese ba jogadór sira iha Taça da Liga ne’e hanesan atu motiva jogadór sira no mos foin-sa’e sira ne’ebé iha talentu atu kontinua promove sira nia aan no treinu maka’as liu tán hodi lori Futeból Timor-Leste ba oin.

“Objetivu ida ne’e ami hanoin liu atu motiva juventude sira, ba dezenvolvimentu futeból nian, atu ba futuru iha juventude sira ne’ebé foin tinan 15, 16 anos sira, atu fó motivasaun ba sira, atu nune’e esforsu aan para sai jogadór ne’ebé mak di’ak  iha futuru no sai jogadór selesaun Timor nian ne’ebé ita hotu sei orgullu hodi lori Timor nia naran ba joga iha liur, ami espera katak iha futuru, iha mos maluk emprezáriu nasional sira bele loke sira nia hanoin, mai ita hamutuk bele, dudu ita nia futeból ne’e ba oin,” Abreo Belo hatutan.

Husi Prémiu hirak ne’e sei entrega iha loron 28 fulan-Fevereiru ne’e, iha ámbitu finál Taça da Liga FFTL hafoin jogu entre Karketu Díli F.C no Emmanuel F.C.

Reportajen Ekipa Rafa.tl