Paraguai Susesu Rekolla Pontu Tolu Hafoin Halakon Turkia 1-0

Paraguai vs Turkia. Imajen/EFE

Díli, 20 Juñu 2026 (RAFA.TL)- Paraguai susesu rekolla pontu tolu hafoin halakon nia adversáriu Turkia ho score 1-0, iha jogu kontinuasaun Kopa Mundiál 2026 ne’ebé hala’o iha Estádiu Levi’s, Santa Clara, Califórnia, Estadus Unidus, Sábadu (20/06/2026).

Paraguai nia vitória ne’e rekolla hafoin jogadór Matias Galarza marka golu iha minutu daruak. Matias Galarza lansa suta ida ho ain-karuk ne’ebé maka halo guarda rede Turkia nian hodi halo baliza la biban atu satan bola ne’ebé tama ba rede laran.

Turkia tenta atu responde liu husi oportunidade ne’ebé iha, maibé Paraguai kaer-metin hodi mantein sira nia vantajen.

Situasaun Paraguai nian sai difisil liután iha minutu ikus besik intervalu hafoin Miguel Almiron hetan kartaun mean. Desizaun ne’e hafoin revizaun VAR nian hafoin jogadór refere halo falta hasoru jogadór adversáriu Mert Muldur.

Tama ba segunda parte, Turkia aumenta presaun hodi buka empata. Maibé, Arda Guler ho nia kolega sira la konsege hetan oportunidade tamba adversáriu hatudu performa ida diak no solidu.

Oportunidade ida ne’ebé di’ak liu husi Turkia mosu bainhira Mert Muldur nia kabesa kona trave baliza paraguaia nian, no  too jogu termina laiha golu ruma akontese nune’e Paraguai mantein ho vitória ne’ebé iha.

Ho vitória ne’e, Paraguai rekolla pontu tolu husi jogu rua iha grupu D. Enkuantu Turkia la rekolla pontu hafoin sofre derrota rua tuituir malu.

Rezultadu ida-ne’e mantén Paraguai nia posibilidade sira atu kompete ba fatin ida iha faze eliminatória nian, enkuantu Turkia iha pozisaun difisil  hodi tama ba nia jogu finál faze grupu nian.

Jornalista: Davilio Valdamir/Editór: Vito Salvadór