Oyarzabal Marka Golu Rua hodi Lori España Hakat Ba Jornada 16 Kopa Mundiál 2026

Imajen/NC News

Díli, 03 Jullu 2026 (RAFA.TL)- Selesaun Españól avansa ba Jornada 16 Kopa Mundiál 2026 hafoin halakon Áustria ho score 3-0 iha jogu faze eliminatóriu ne’ebé hala’o iha Estádiu Los Angeles, Estadus Unidus Amérika (EUA), Sesta (03/07/2026).

Iha jogu ne’e, jogadór españól Mikel Oyarzabal maka sai hanesan eroi ba La Furia Roja, hafoin marka golu rua, enkuantu Pedro Porro marka ida hodi kompleta sira nia vitori ba jornada 16.

España hahú domina no halo kontrolu ba jogu ne’e iha kedas inísiu. Oportunidade dahuluk to’o iha minutu daruak bainhira Lamine Yamal lansa suta ida hosi área penalidade nia li’ur, maibé guarda-rede austríaku Alexander Schlager konsege hapara.

España kontinua fó presaun ba defeza austríaku. Iha minutu 30, Marc Cucurella hetan rede hafoin halai iha rebote ida tuir fali baliza ida, maibé golu ne’e la permite hosi árbitru tanba falta ida durante preparasaun.

Tama ba minutu 36 Mikel Oyarzabal marka golu ida hodi loke dalan ba vitóri ne´e hodi muda score ba 1-0.

Tama ba segunda parte, España domina nafatin jogu, no Mikel Oyarzabal ameasa ho kabesa ida hosi kantu, maibé sei dok husi alvu.

Áustria tenta halo kontra atake iha minutu 61 liuhosi kabesa ida hosi Sasa Kalajdzic, maibé bola ne’e liu de’it hosi trave Unai Simon nian.

España ikus mai aumenta sira nia golu daruak iha minutu 66 liu husi Pedro Porro no muda score ba 2-0. Yamal konsege lansa ameasa ida maibé sei kontinua falla.

Tama ba minutu 89, Mikel Oyarzabal marka golu daruak hodi taka vitória España nian ho score 3-0, hafoin aproveita pasajen husi Cucurella.

To’o jogu termina, España kontinua lidera no ho vitória ne´e lori ekipa Español ba hasoru nia adversáriu Selesaun Nasionál Portugal iha jornada 16.

Jornalista: Marito da Costa/Editór: Vito Salvadór