Órgaun Ezekutivu AFTL Deside Muda Liga Futsal Timor-Leste Ba Setembru

Enkontru órgaun liga LFTL. Imajen/dok.LFTL

Díli, 20 Agostu 2026 (RAFA)- Asosiasaun Futsal Timor-Leste (AFTL), liuhosi órgaun ezekutivu deside muda abertura Liga Futsal Timor-Leste époka 2026 ba fulan-Setembru ho razaun finansiamentu ne’ebé órgaun liga iha la sufisiente no sei halo aproximasaun ho patrosinador sira hodi apoiu liga ba époka ne’e.

“Proposta husi AFTL iha fulan-jullu hetan redusaun husi Federasaun, ami tenke komunika ba klubu sira tanba sira mak hetan impaktu maka’ás aumezmu tempu Asosiasaun mós buka hela patrosinador para reforsa nafatin orsamentu ne’ebé iha para bele realiza Liga Futsal ho situasaun ida ne’e. Planu atu abertura iha inisiu fulan-Setemberu, tinan ne’e,” Sekretariu Jerál AFTL Mario Guterres  informa ba RAFA iha Díli, foin lalais ne’e.

Nia hateten katak Liga Futsal adia tanba Federasaun Futeból Timor-Leste (FFTL) aprova tarde proposta orsamentu ne’ebé AFTL submete  afeta diretamente kalendáriu Liga Futsal, ne’ebé AFTL trasa ona antes. Kondisaun ida ne’e obriga AFTL atu halo ajustamentu fali ba kalendáriu kompetisaun.

Sekretáriu Jerál AFTL ne’e hateten katak subsídiu ba klubu sira ba Primeira Divizaun kada klubu sei simu US$ 2,000.00 enkuantu ba klubu Segunda Divizaun sei simu US$1,000.00.

Husi soin seluk Amantes Futsal Aking Ung, triste ho adiamentu Liga Futsal, maibé situasaun ida-ne’e labele obriga, tanba programa ne’e seidauk hetan apoiu husi Governu. Até agora, apoiu ba realizasaun Liga Futsal depende liu husi FFTL, inklui orsamentu ne’ebé sei fó ba kompetisaun.

“Hanesan amante ita sente triste maibé ita labele obriga tanba programa refere la iha apoiu husi governu maibe apoiu de’it husi FFTL no orsamentu mos depende ba FFTL atu apoiu hira ba Liga.” hatete Aking Ung.

Nia esplika, klubu sira ne’ebé kontratu jogador estranjeiru ne’e prejudika la’ós de’it estranjeiru maibé lokal sira hotu tanba klubu iha Timor maioria aluga kampu entaun anunsiu ofisial sai katak Liga ne’e se’i hahu iha dia 25 de jullu depois la iha novidades kansela ba iha Agustu agora la iha nafatin ba fali setembru maibé maibé salariu vensimentu ba jogadores no treinador ho jogador estranjeiru sira ne’ebé mak agora mai ona Timor ne’e lao nafatin.

Ho situasaun ida-ne’e todan ba klubu sira, Tanba ne’e, espera AFTL no FFTL bele servisu hamutuk atu rezolve problema sira ne’e tanba futsal sai ona modalidade promesa ba Timor-Leste.

“Ho dezenvolvimentu no mudansa ne’ebé ita haré iha estatístika sira, maski jogador sira joga iha sumenti leten, maibé sira bele adapta no kontinua dezenvolve,” Aking Ung hateten.

Jornalista: Davilio Valdamir