Polísia Halo Buska no Apreensaun Bá Reitór ho Dirijente Sira UNTL Nian

Polísia Nasionál Timor-Leste halo buska no apreensaun ba Reitór, pro-reitór no dirijente sira UNTL nian seluk, Kuarta (06/08/2025). Imajen/RAFA.tl

DILI, RAFA.tl— Polísia Nasionál Timor-Leste (PNTL),  Diresaun Servisu Investigasaun Kriminál (DSIK), akompaña husi Batallaun Orden Públika (BOP),  Kuarta dadeer (06/08/2025), halo buska no apreensaun ba Reitór no Pro-Reitór ho dirijente sira Departamentu Payroll no Kontabilidade iha Universidade Nasionál Timor Lorosa’e (UNTL) ne’ebé deskunfia iha indísiu krime falsifikasaun dokumentu no anotasaun téknika ne’ebé previstu iha artigu 303° husi kódigu penál Timor-Leste.

 Asaun Polísia sira halo buska no apreensaun ne’e baze ba mandadu Tribunál Judisiál Primeiru Instánsia Dili (TJPID) ho Númeru Úniku Krime (NUC, sigla portugés) 01 86/25-PNSIK.

Molok hahú buska no apreensaun ne’e, Polísia sira aprezenta  uluk madadu husi Tribunál ba Reitór UNTL, João Soares Martins, no kontínua halo buska mós ba fatin servisu pro-reitór sira ho dirijente sira iha departamentu payroll no kontabilidade nian.

“Ami ezekuta mandadu buska no apreensaun husi  Tribunál Judisiál Primeira Instánsia Dili. Ami presiza señor Reitor nia fatin ne’ebé ami sei buska, inklui pro-reitór ho dirijente sira hamutuk ema na’in lima seluk tan,” Polisiál  aprezenta razaun buska ba Reitór UNTL.

Iha buska no apreensaun ne’e órgaun Polísia Kriminál arrola dokumentu ka porova balun, hanesan resibu   ba ezekusaun orsamentu UNTL nian, inklui dokumentu sira ne’ebé sai hanesan relatóriu anuál.

Órgaun  Polísia husi  Diresaun Servisu Investigasaun Kriminál (DSIK) mós arrola evidénsia sira hanesan osan no halo mós buska no apreensaun ba parte ne’ebé sira-nia naran konsta iha dokumentu mandadu TJDIP nian ne’e ba sira nia rezidénsia idaidak.  

Reportajen Ekipa RAFA