Noruega Kualifika Ba Faze Eliminasaun Hafoin Halakon Senegal 3-2

Selesaun Nasionál Noruega kualifika ba faze eliminasaun Kopa Mundiál 2026 hafoin halakon Senegal ho score 3-2. Imajen/Globo

Díli, 23 Juñu 2026 (RAFA.TL)- Selesaun Nasionál Noruega kualifika ba faze eliminasaun Kopa Mundiál 2026 hafoin halakon Senegal ho score 3-2 iha jogu apuramentu grupu I ne’ebé halao iha Estádiu Nova Iorke Nova Jersey, Tersa (23/06/2026).

Noruega ameasa dezde minutu daruak, maibé Antonio Musa nia suta ho distánsia dook sai hosi poste liman-loos. Liu tiha minutu ida, Kristoffer Ajer nia ulun hetan blokeiu hosi guarda-redes Senegal nian, Edouard Mendy.

Martin Odegaard iha oportunidade iha minutu 14, maibé nia suta sei dook husi alvu. Senegal tenta halo ameasa, maibé suta Nicolas Jackson nian iha minutu 28 sai dook husi alvu.

Jogadór Noruega Martin Odegaard besik atu marka golu iha minutu 37 hafoin simu pasajen ida hosi Haaland, maibé nia suta hetan blekeia hosi Mendy no Senegal lansa kedas kontra atake iha minutu 39 ho suta dook husi Idrissa Gueye ne’ebé liu de’it.

Noruega ikus mai marka golu iha  43, hafoin Kalidou Koulibaly nia erru hodi hamoos pasajen ida permite bola monu iha Pedersen nia ain no lansa kedas suta ne’ebé maka’ás no bola tama kedas ba rede Senegal nian hodi muda score ba 1-0.

Senegal tenta halo empata, maibé Ismaila Sarr nia suta iha tempu estra hetan salva hosi guarda-rede noruegués Orjan Nyland.

Haaland mós iha oportunidade osan-mean rua iha baliza Senegal nia oin iha tempu estra nian, maibé ida baku ba poste no ida seluk blokeia hosi Mendy.

Hafoin intervallu, Noruega aumenta sira nia golu iha minutu 48, liu husi Erling Haaland hafoin simu asistensia bola husi Odegaard.

Ho golu rua, Senegal tenta halo balansu no tama ba minutu 53 jogadór Ismaila Sarr remata bola liuhosi Sadio Mane nian hodi marka golu no muda score ba 1-2.

Golu ne’e liu deit minitu lima, Noruega liu husi Erling Haaland marka kedas golu hodi muda score ba 3-1 iha minutu 58.

Senegal hetan oportunidade hodi marka golu daruak iha tempu estra 90+3  liu husi Ismail Sarr hodi hamihis score ba 3-2.

Ho rezultadu ida-ne’e, Noruega tuur iha segundu lugar iha klasifikasaun ho pontu neen, tuir Fransa ne’ebé maka iha primeiru lugar tanba diferensa golu.

Ekipa rua ne’e sei hasoru malu iha sira nia jogu ikus hodi determina se mak sei lidera grupu grupu ne’e.

Senegal iha fatin datoluk ho pontu zero, liu Irake ho diferensa golu. Sira presiza manan iha sira nia jogu ikus hasoru Irake hodi mantein sira nia esperansa atu kualifika liuhosi mellor terseiru lugar.

Jornslista: David Gonçalves/Editór: Vito Salvadór