Nilton Gusmão ho Tenente-Jenerál Falur Rate Laek, Kandidatu Úniku Elejível Lidera FFTL Períodu 2026-2030

Atuál prezidente FFTL, Nilton Telmo Gusmão dos Santos ho Vise-Prezidente Tenente-Jenerál Domingos Raul Falur Rate Laek, sai hanesan kandidatu úniku ne’ebé elejível ba lidera FFTL períodu 2026-2030. Imajen/dok.FFTL

DILI, RAFA.tl – Atuál prezidente Federasaun Futeból Timor-Leste (FFTL), Nilton Telmo Gusmão dos Santos ho Vise-Prezidente Tenente-Jenerál Domingos Raul Falur Rate Laek, sai hanesan pakote kandidatu úniku ne’ebé elejível ba lidera FFTL  períodu 2026-2030.

Notísia Relevante: FIFA Nomeia Prezidente FFTL Nilton Telmo Gusmão dos Santos Ba Komité Permanente Anti-Rasízmu no Deskriminasaun

Komité Independente hanesan Komité Eleitorál, Komité Étika no Dixiplinár, Komité Auditória no Konformidade no Komité Rekursu iha Federação Futeból Timor-Leste (FFTL), Sábadu (10/01/2026),  fó anúnsiu ofisiál ba rezultadu hosi prosesu selesaun dokumentu proposta kandidatura ba membru ezekutivu FFTL.

Hatetuk ba Estatutu FFTL no Kodigu Eleitorál edisaun 2024, Komité Eleitorál Notifika ba Membru Asosiasaun sira iha loron 01 fulan-Dezembru 2025 (Estatutu FFTL Art. 32.2), hodi bele submete kandidatura poténsia ba vaga prezidente, vise-prezidente no membru ezekutivu. Data limite kandidatura nian to’o loron 25 fulan-Dezembru 2025, 24:00 / 00:00 OTL (Kódigu Eleitorál FFTL, Art. 9.2)

Husi prosesu ne’e fó tán prazu loron lima (5) nia laran hahú husi prazu submete formuláriu kandidatura husi loron 26 fulan-Dezembru  to’o loron 30 fulan-Dezembru 2025 (kódigu Eleitorál FFTL Art, 9.3), Komité Eleitorál halo verifikasaun ba kandidatura sira nia proposta, kuandu seidauk kompletu bele kompleta dokumentus tuir prazu ne’ebé determina.

Komité Eleitorál fó tán loron tolu (3) entre loron 31 fulan-Dezembru 2025 to’o loron 02 fulan-Janeiru 2026, ba kandidatura sira atu kompleta sira nia proposta kandidatura, notifika no komunika.

Relativamente ho proposta kandidatura membru ezekutivu FFTL ne’e, kandidatu prezidente ida mak la prenxe rekejitu no konsidera eliminadu iha prosesu ida-ne’e, notifika fó tan loron-tolu (3) hodi kompleta dokumentu esensiál sira, mas to’o data determinadu la konsege resubmete no kandidatura ba Kargu Prezidente FFTL, Vise Prezidente no Membru Ezekutivu efetivu na’in-lima (5) prense rekezitu sira.

Portavós Komité Independente FFTL, Amândio dos Santos, esplika ba anexu A nú 6) Komité Eleitorál entrega dokumentu kandidatura hamutuk ema na’in-ualu ba Komité Auditoria, Konformidade no Komité étika no Dixiplinár hodi halo verifikasaun integridade, hodi haré kondidatura poténsia hirak ne’e passa ba prosesu tuir mai ka lae. Após komité rua halo verifikasaun ba integridade entrega ho akta verifikasaun, Komité Eleitorál halo validasaun iha loron 08 fulan-Janeiru tinan 2026.

“Komité Independente hamutuk hodi pronunsia rezultadu kandidatura sira nian ba públiku hanesan kandidatura Prezidente FFTL, Nilton Telmo Gusmão dos Santos, elejível no ne’ebé la elejível ba kongresu períodu 2026-2030 mak Francisco Martins da Costa P. Jeronimo, Kandidatura Vise-Prezidente FFTL ne’ebé elejível ba kongresu períodu 2026-2030 mak Domingos Raul Falur Rate Laek, Kandidatura ba Membru Ezekutivu FFTL ne’ebé kompostu husi ema na’in-lima mak elejível ba Kongresu períodu 2026-2030 mak hanesan Domingos dos Santos Caeiro, Henrique da Costa, José Luís Oliveira, Faustino Godinho da Costa, Engrácia Pimentel Fernandes,” Amândio dos Santos  informa ba jornalista sira liu husi konferénsia imprensa iha Xanana Sport Center, Díli.

Prosesu verifikasaun ida ne’ebé rigorozu, transparente hodi hala’o tuir de’it ba regulamentu ne’ebé estipula ona iha Kódigu Eleitorál no Estatuto FFTL. Kandidatura hamutuk ema na’in-ualo (8) hanesan temi ona, Komité Independente pronunsiu rezultadu naran kandidatura sira ne’ebé elejível no la elejível ba kongresu FFTL mandatu 2026-2030 mak hanesan tuir mai:

Komité Independente hakarak parabeniza ba kandidatura hotu-hotu ba esforsu hodi bele submete proposta kandidatura hodi kompete, ho vontade no dedikasaun ne’ebé hatudu iha prosesu ida ne’e. Komité Independente hakarak fó haksolok katak sira ne’ebé sei eleitu iha Kongressu ordinariu mai, iha kompromisu, vizionariu atu lidera Federação Futeból de Timor- Leste ba futuru ne’ebé boot ho progresu no susesu iha dezenvolvimentu futeból iha Timor- Leste.

“Komité Independente agradese ho sinseru ba públiku liu-liu amante futeból, Asosiasaun, Federasaun no klube sira ne’ebé iha fiar mai Komité Independente, hodi hala’o prosesu ida ne’e ho Independentemente, ho integridade as, justu no imparsial. Molok to’o Kongressu Ordináriu, Komité Independente sira sei Notifka Kandidatura potensiál sira hodi prepara aan molok Kongressu realiza,” Amândio dos Santos  tenik.

Hanesan temi ona, Komité Independente reafirma ninia kompromisu atu promove demokratizasaun no kontribui futeból hanesan meiu ba unifikasaun, dezenvolvimentu no orgullu nasionál. Hamutuk, Komité Independente sei kontinua atu fortalese prosesu ida ne’e no inspira amante futeból iha Timor-Leste.

Komité Independente eleitu liu husi Kongressu Extraordináriu iha loron 26 fulan-Outubru tinan 2024 no kontinua fó fiar hodi lidera prosesu Kongresu FFTL mandatu 2026-2030.

Reportajen ekipa Rafa.tl