Negosiasaun Formál Segunda Ronda Fronteira TL-RI iha Sinál Pozitivu

Enkontru negosiasaun faze daruak iha Jorgjakarta-Indonézia hodi diskute fronteira TL-RI. Imajen/Média G-PM

DILI, RAFA.tl- Negosiasaun formál segunda ronda kona-bá fronteira Timor-Leste ho Repúblika Indonézia ne’ebé hala’o iha Jogjakarta, lori satisfasaun ba ekipa negosiadór hosi Timor-Leste (TL) ho Repúblika Indonézia (RI) tanba konsege ko’alia ba malu, simu ideia no iha vontade atu avansa bá etapa tuir-mai ne’ebé marka ona ba fulan-Abríl 2026.
Notísia Relevante: PM Xanana Sei Partisipa Negosiasaun Ronda Daruak Kona-bá Fronteira TL-RI

Iha komunikadu ofisiál ne’ebé Rafa.tl asesu husi Gabinete Média Primeiru-Ministru, Kinta (11/12/2025) haktuir, Primeiru-Ministru (PM), Kay Rala Xanana Gusmão observa katak durante prosesu negosiasaun iha ronda da-ruak ne’e ekipa hosi parte rua hatudu vontade bo’ot ne’ebé hakarak tebetebes atu rezolve duni fronteira rai rua nian.

“Ha’u labele ko’alia buat barbarak tanba formalmente ita foin hahú agora iha Jogjakarta. Ne’e duni, ha’u espera katak negosiasaun tuir mai iha fulan-Abríl, tinan oin, sei bele dehan buat ruma. Ha’u labele dehan ha’u kontenti tebes maibé satisfeitu tanba ita haré katak ita bele ko’alia ba malu, bele simu ideia ba malu. Ida-ne’e mak prinsípiu di’ak ida iha negosiasaun ne’ebé difísil kona-bá fronteira,” Primeiru-Ministru Kay Rala Xanana Gusmão hateten.

Negosiasaun formál primeira ronda hala’o iha fulan-Agustu 2025 iha Dili no segunda ronda hala’o iha Jogjakarta. Ekipa konkorda ona atu kontinua negosiasaun formál tuir-mai iha fulan-Abríl 2026.

“Durante loron-rua ho balun ne’e diskusaun la’o di’ak, ho abertura hosi parte Indonézia lidera hosi Embaixadór Amrih. Ita senti katak iha abertura, iha kooperasaun, iha duni vontade hosi Governu Indonézia atu rezolve ita-nia fronteira sira,” Xefe Governu Timor-Leste ne’e subliña.

Negosiasaun formál segunda ronda kona-bá fronteira iha Jogjakarta hala’o durante loron-tolu; husi loron 08 to’o loron 10 fulan-Setembru 2025, taka ho asina akta hosi xefe delegasaun nasaun rua nian.

Timor-Leste asina hosi atuál Diretora Ezekutiva Gabinete Fronteira Terestre no Marítima (FTM), Elizabeth Exposto no parte Indonézia asina hosi Diretór Jerál Asuntu Jurídiku no Tratadu Internasionál sira, Ministériu Negósiu Estranjeiru, Embaixadór L. Amrih Jinangkung, iha The Phoenix Hotel, Jogjakarta, Indonézia, Kuarta (10/12/2025).

Rohan hosi serimónia asinatura akta ne’e ekipa hosi Timor-Leste entrega tais, kafé Timor ho livru ba xefe delegasaun Indonézia nian no foto hamutuk.

Reportajen ekipa Rafa.tl