Natal Tempu Atu Hafoun Vokasaun Sarani Nian no Sai Roman Ba Sosiedade

Arsebispu Arkidioseze Metropolitana Díli, Dom. Virgílio Cardeal do Carmo da Silva, SDB akompaña husi Bispu Dioseze Maliana, Dom. Norberto Amaral do Amaral. Imajen/Rafa.tl

DILI, RAFA.tl – Arsebispu Arkidioseze Metropolitana Díli, Dom. Virgílio Cardeal do Carmo da Silva, SDB  hatete, iha Natal ne’e Santa Kreda hanorin sarani sira atu hafoun idaidak nia vokasaun sarani nian, atu sai Kristu ida seluk, atu sai naroman ida ba fatin sira ne’ebé sei iha nakukun.

Arsebispu Arkidioseze Metropolitana Díli, Dom. Virgílio Cardeal do Carmo da Silva, SDB, iha mensajen Natal ne’ebé halo iha Pasu Episkopal Lecidere, Tersa (23/12/2025) hatete, kosok oan ida moris mai ita, Oan mane ida fo mai ita (sásin Profeta Isaias nian), Nia ukun to’o ba rai hotu-hotu no nia damen sei hela ba nafatin.

Arsebispu hatutan, ida ne’e la’ós poezia ida ne’ebé furak, maibé promesa ida Maromak nian. Maromak buat hotu Nia Na’in , prinsípiu damen nian, tama iha ita nia istória la’ós atu konkista ho espada no koroa, maibé iha kosok oan folin laek ida iha sidade ne’ebé ema la koñese.

“Kosok oan ne’e moris mai ha’u no ba o, liafuan Maromak nian ne’ebé halo aan ba ema no hola isin ita ema nian atu kura ita husi laran, iha prezépiu ita haré no hatudu mai ita Maromak nian Fuan, Nia hili pobreza duke poder, hakbesik mai ita (intimidade) duke hela dook (distánsia). Nia Moris atu halakon sala, hakonu mundu ho naroman Lalehan nian. Hanesan ema uluk nian dehan, Natal Festa ida Maromak halo an ba ema “Incarnação” iha ne’ebé Lalehan rein rai no muda ita ema ba nafatin, husi nakukun ba naroman,” Arsebispu Dom. Virgílio Cardeal do Carmo da Silva, esplika.

Kosok oan ida mós ohin moris mai ita la’ós tinan rihun rua liubá de’it, iha Eukaristia, iha kiak sira, iha ita nia família, iha ita nia ksolok no iha ita nia terus, iha ita nia sakrifísiu sira lor-loron nian.

Mundu komersializa Natal ho sasán oi-oin no iha ita nia rain ita hare oinsa ita selebra Natal, árvore Natal iha sikun sira, ahi oan Natal mos nabilan iha fatin hotu-hotu, dekorasaun natal nian iha ofísiu no uma sira, maibé husi prezépiu ko’alia mai ita mensajem ida ne’ebé kontráriu, ksolok ne’ebé los nian la’os hetan iha halibur no simu ba an rasik maibé iha ida ne’ebé hatene fó ita nia an ba Nia ne’ebé kolu nia an husi buat hotu-hotu tanba ita, mai ita mos iha Natal aprende deskobre ksolok nebé los la’os halibur maibé hatene fahe. La’ós iha sasán maibé iha Kristu!

“Koko atu deskobre Kosok oan ne’e iha imi nia família, Kosok oan ne’e ohin bolu ita atu adora ho hahalok haraik-an nian no hatene perdua malu, iha mundu ida iha ne’ebé hirus malu, laran moras malu, ódio malu, funu, haketak malu tanba ema nia arogánsia, ambisaun, no indiferensa,” Arsebispu tenik.

Nia mai ba hotu-hotu, ba ida ne’ebé lakon tiha ona sabór atu moris, ida ne’ebé la iha tan ona Fiar. Domin no Esperansa, buka sai belun ba hirak ne’ebé sente mesak “abandonado”, perdua hirak ne’ebé hakanek ita nia fuan, harohan ba ida nebé ita konsidera ita nia inimigu.

Sentidu Natal nian katak, Maromak ho ita (Imanuel), atu ho kosok Oan Jesus ne’ebé moris iha ema nia leet, hanorin ita atu simu ita nia família, uma, fuan, no iha ita nia mundu.

Reportajen ekipa Rafa.tl