Natal Nu’udár Tempu Domin no Rekonsiliasaun

Prezidente Konferénsia Episkopal Timorense (CET, sigla portugés), Dom. Virgílio Cardeal do Carmo da Silva, SDB hamutuk ho Bispu Dioseze Baucau Dom. Leandro Maria Alves no Bispu Dioseze Maliana Dom. Norberto do Amaral. Imajen/Rafa.tl

DILI, RAFA.tl- Prezidente Konferénsia Episkopal Timorense (CET) nu’udár mós Arsebispu Arkidioseze Metropolitana Dili, Dom Virgilio Cardeal do Carmo da Silva, SDB hatete, Natal nu’udár tempu domin no rekonsiliasaun.

Prezidente CET, Dom Virgilio Cardeal do Carmo da Silva, SDB ba jornalista sira iha Palásiu Prezidensiál, Tersa (16/12/2025) hateten dala-barak sarani sira hanoin katak Selebra Natal tenke iha festa, hanoin deit kona-bá feriadu, toka múzika no mós hanoin kona-bá dekorasaun Natal nian sira ne’ebe maka sempre nabilan no naroman iha tempu kalan. Dekorasaun sira ne’e hotu hola parte mós ba iha ema nia preparasaun hodi hein Jesus kosok oan ne’ebé maka sei selebra nia loron iha 24 kalan no 25 loron.

Arsebispu ne’e hatutan selebrasaun festa Natal ne’e hanesan momentu furak ida atu konvida fila-fali sarani Timoroan hotu atu bele halo ezame konsiensia, halo reflesaun, momentu mós atu ko’alia kona-bá domin.

“Natal momentu furak ida ne’ebé konvida ita Timoroan hotu, liu-liu ita sarani, momentu ida atu ita hateke ba ita nia laran, hateke ba ita nia fuan, tanba Natal ita ko’alia kona-bá domin no rekonsiliasaun,” Dom Virgilio Cardeal do Carmo da Silva hateten.

Tanba domin maka Maromak halo aan kiik no kiak, mai moris hamutuk ho ema atu fahe domin. Nune’e, hanesan sarani, idak-idak presiza iha korazen ba nia aan liu-liu iha tempu adventu ida ne’e, hateke ba ita-nia fuan, hodi prepara ita-nia aan, hatene fó tempu ba ita nia aan hodi reflete ita nia aan.

“Tempu atu ita bele hafoun ita-nia domin, hafoun ita-nia hahalok sira, hafoun ita-nia hanoin sira, ho Kristu Nia moris hanesan oportunidade ida mai ita, atu hafoun ita-nia aan, hodi Natal ida-ne’e sai furak ba ema hotu,” Arsebispu tenik.

Líder Igreja Katólika Timor-Leste ne’e subliña katak Natal la’ós ko’alia kona-bá ba selebrasaun deit, maibé oinsá ema ida prepara nia aan, hodi bele hasoru malu ho Maromak oan ne’ebé halo aan ba ema.

Festa Natal hanesan tempu ne’ebé ema hotu presiza atu kuda domin, dame, rekonsiliasaun, ne’ebé Santa Kreda ninia knaar liu husi amu-lulik sira kontinua haklaken ida-ne’e depende ba idak-idak presiza hateke ba moris hodi halo tuir.

Prezidente CET ne’e mós konvida Sarani sira atu aproveita tempu adventu ne’e ho didiak, hodi hatene hateke ba aan rasik, labele hateke deit ba naroman ne’ebé maka dekorasaun nian, maibé presiza hateke ba laran hodi bele ajuda ema, bele koñese aan rasik diak liután atu selebra Natal ho ksolok iha Kristu Nia domin.

Reportajen Ekipa Rafa.tl