Nagardjo F.C Marka Golu Tolu Ba Nia Adversáriu Vila Atáuro F.C

Ekipa Nagardjo F.C ho Vila Atáro F.C

Díli, 11 Juñu 2026 (RAFA.TL)– Ekipa Nagardjo F.C marka golu tolu ba nia adversáriu Vila Atáuro F.C iha jogu ikus Grupu A Liga Timorense Segunda Divizaun époka 2026, Kuarta (10/06/2026), iha Estádiu Munisipál Díli.

Iha jogu ikus ne´e, ekipa rua iha hotu ambisaun hanesan hakarak rekolla vitória. Vila Atáuro F.C ne’ebé iha jogu tolu antes la rekolla pontu másimu hakarak halo esforsu atu hetan oportunidade hodi rekolla vitória no muda pozisaun iha tabela klasifikasaun.

Ekipa rua mantein halo kontra atake ba malu tuir ritmu jogu ida-idak nian, maibé ekipa Nagardjo F.C kontinua halo presaun ba  Vila Atáuro F.C no susesu lidera jogu ne’e hodi marka golu ida ba iha minutu 31 liu husi jogadór Aquenino Marquez.

Vila Atáuro F.C nafatin halo jogu ho kalma hodi buka oportunidade oinsá marka golu atu halo empata no tama ba minutu 44 Vila Atáuro F.C susesu marka golu ida liu husi jogadór Narasio Sarmento hodi muda score ba 1-1.  Ekipa rua mantein ho score ne’e  too  jogu primeira parte termina.

Tama ba segunda parte, ekipa rua hahú halo mudansa ba tátika.  Ida-idak hasa’e nia intensidade jogu ho ritmu lais tui teknika ne’ebé iha, maibé Nagardjo F.C domina liu jogu no marka tan golu ida iha minutu 66 liu husi jogadór Avrely Suebu hodi muda score ba 2-1.

Vila Atáuro F.C halo tranjisaun ba liña jogadór hodi halo esforsu oinsá halo empata, maibé ekipa Nagardjo F.C mantein disiplina no halo kontra atake ba adversáriu hodi lansa amiasa ne’ebé fó risku ba adversáriu Vila Atauro F.C.

Tama ba minutu 70, Nagardjo F.C kontinua marka tan golu ida liu husi Avrely Suebu hodi muda score ba 3-1 no golu ne´e mantein too jogu remata.

Ho rezultadu ne’e ekipa Nagardjo F.C susesu rekolla pontu tolu no Vila Atáuro F.C obrigadu tenke fila ho liman mamuk.

Ho vitória ne’e lori Nagardjo F.C rekolla pontu lima iha tabela klasifikasaun grupu A segunda divizaun liga timorense époka 2026 no Vila Atáuro F.C rekolla deit pontu ida husi jogu haat no okupa zona mean tabela klasifikasaun nian.

 Jornalista: Marito da Costa/Editór: Vito Salvadór